د پاکستاني رسنیو د راپورونو له مخې، د چهارشنبې په ورځ د خیبرپښتونخوا اړوند اورکزیو اېجنسۍ کې د پاکستاني پوځیانو پر موټریز کاروان د برید په پایله کې د دوو افسرانو په ګډون ۱۱ پوځیان وژل شوي.
د سرچینو په خبره، برید هغه مهال شوی چې پاکستاني پوځیانو په سیمه کې د دوی په خبره د وسله والو ډلو د پلټنې چاڼیز عملیات ترسره کول. معلومات ښیي چې لومړی د پوځ پر موټریز کاروان د سړک غاړې ځای پر ځای شویو بمونو چاودېدلي او بیا نښته رامنځته شوې.
د پاکستان پوځ د یوې اعلامیې په خپرولو سره په دې برید کې د خپلو ۱۱پوځیانو وژل کېدل منلي او په ځوابي برید کې یې د تحریک طالبان پاکستان د ۱۹ تنو له منځه وړلو ادعا کړې.
تحریک طالبان پاکستان(ټيټيپي) په یوه اعلامیه کې د دې برید مسوولیت منلی او دا برید یې د خپلو عملیاتو د دوام لړۍ یاده کړې ده.
د ټيټيپي په اعلامیه کې له ۳۰ زیاتو پاکستاني پوځیانو د وژل کېدو ادعا شوې.
د راپورونو له مخې، وروستیو کې پر پاکستاني پوځیانو د ټيټيپي بریدونه تر ټولو لوړې کچې ته رسېدلي دي.
اورکزیو اېجنسۍ کې له تازه برید وړاندې د جون په ۲۸مه د شمالي وزیرستان په میرعلي سیمه کې د پاکستاني پوځ پر کاروان موټر بم برید تر ټولو مرګونی و چې په پایله کې یې د افسرانو په ګډون ۱۶ پوځیان ووژل شول او لسګونه نور ټپیان شول.
پر پاکستاني پوځیانو دغه مرګونی برید داسې مهال ترسره شوی چې تېره ورځ د اسلاماباد د څېړنو او امنیتي مطالعاتو مرکز په یوه راپور کې د روان ۲۰۲۵ زېږدیز کال تېرې نهه میاشتې تر بل هر وخت له امنیتي پېښو او بریدونو ډکې یادې کړې او وايي، یوازې د ۲۰۲۵ زېږدیز کال په درېیو لومړیو میاشتو کې د وسله والو بریدونو او چاودنو کې د دې هېواد د امنیتي او پوځي پرسونل په شمول شاوخوا ۲۴۱۴ کسان وژل شوي.
