د اسلاماباد د څېړنو او امنیتي مطالعاتو مرکز په یوه راپور کې ویلي، د روان کال لومړیو نهو میاشتو کې د تېر کال په پرتله د امنیتي پېښو کچه په بې مخینې ډول لوړه شوې.
راپور کې راغلي، د ۲۰۲۵ کال یوازې په درېیو ربعو کې شاوخوا ۲۴۱۴ کسان وژل شوي، حال دا چې دا کچه په ټول ۲۰۲۴ کال کې ۲۵۴۶ تنه وه.
د تېر کال لومړیو درېیو میاشتو کې ۲۵۴ کسان د بېلابېلو امنیتي پېښو له امله وژل شوي وو، خو د روان کال په همدې موده کې بیا نیږدې ۹۰۰ کسان وژل شوي.
د اسلاماباد څېړنو او امنیتي مطالعاتو مرکز راپور کې زیاته شوې: « د ۲۰۲۵ کال لومړۍ ربع (درېیو میاشتو) کې ټولې ۳۵۴ امنیتي پېښې شوې چې په کې ۸۹۷ تنه وژل شوي او ۵۴۲ نور ژوبل شوي دي. دغه پېښې په خیبرپښتونخوا او بلوچستان کې شوې.»
د راپور د معلوماتو له مخې، دا شمېرې د تېر کال د لومړۍ ربع په پرتله نږدې ۴۴ سلنه زیاتوالی ښیي. همدارنګه، په راپور کې د کال دویمه ربع هم د پاکستاني پوځیانو لپاره مرګونې بلل شوې. د سرچینې په خبره، له اپرېل ترجون میاشتې د وژل شویو کسانو کچه ۶۱۵ ته رسېدلې، حال دا چې تېر کال دا شمېر ۲۲۰ تنه وه.
د اسلاماباد څېړنو او امنیتي مطالعاتو مرکز راپور کې زیاته شوې: « د ۲۰۲۵ کال په دویمه ربع کې ټول ۲۹۷ امنیتي پېښې رامنځته شوې چې له امله یې ۶۱۵ تنه وژل شوي او ۳۸۸ نور ژوبل شوي دي. دغه پېښې په خیبر پښتونخوا، بلوچستان، اسلاماباد، ازاد کشمیر او پنجاب کې شوې دي.»
د سرچینې په خبره، د روان کال په دویمه ربع کې د تلفاتو شمېر د تېر کال پرتله ۱۷.۷ سلنه زیاتوالی ښيي.
همدارنګه، د ۲۰۲۵ کال وروستیو درېیو میاشتو کې بیا د تلفاتو کچې ته په کتو پاکستاني پوځ لپاره تر ټولو خونړۍ وې. په جولای، اګسټ او سپټمبر میاشتو کې د امنیتي پېښې تر ټولو لوړې کچې ته رسېدلې دي چې له امله یې شاوخوا ۹۰۰ کسان وژل شوي.
د اسلاماباد څېړنو او امنیتي مطالعاتو مرکز راپور کې ویل شوي: « د ۲۰۲۵ کال په درېیمه ربع کې ټولټال ۳۲۹ امنیتي پېښې شوې چې له امله یې ۹۰۱ تنه وژل شوي او ۵۹۹ نور ژوبل شوي دي. دغه پېښې هم تر ډېره خیبر پښتونخوا او بلوچستان کې شوې.»
د سرچینې د معلوماتو له مخې، د ۲۰۲۴زېږدیز کال لومړیو نهو میاشتو کې د وژل شویو ټول شمېر ۱۵۲۷ تنه و، خو روان کال بیا تر اوسه د مړینو کچه ۲۴۱۴ تنو ته رسېدلې چې د تېر کال په پرتله نږدې ۴۶سلنه زیاتوالی ښیي.
د سرچینې په خبره، په وژل شویو کسانو کې پاکستاني نظامیان، د حکومت وسله وال مخالفین او عام وګړي شامل دي.
شنونکي بیا په پاکستان کې د امنیتي پېښې لوړ ګراف ته په اشارې د افغانستان په ګډون یو شمېر نورو ګاونډیو هېوادونو پر وړاندې د دغه هېواد له لوري د ناکامو سیاستونو تعقیب او خپله خاوره کې وسله والو ډلو ته د خوندي پټنځایونو ورکول ګڼي.
د نړیوال اړیکو کارپوه نجیبالرحمان شمال وايي: « ترهغو چې پاکستان د افغانستان په اړه خپلو ژمنو او دغه راز په پاکستان کې له ترهګرو ډلو سره مبارزه کې صادقانه عمل ونه کړي، دغه نا امنۍ به سرتاسري شي او ټول پاکستان ته به وغځېږي.»
راپورونه ښیي چې پاکستان کې امنیتي پېښې وروستیو کې په بې مخینې ډول زیاتې شوې دي. د اسلاماباد د څېړنو او مطالعاتو مرکز اټکل کړی چې که په دې هېواد کې اوسنۍ لړۍ دوام وکړي، ۲۰۲۵ کال به د تېرو لسو کلونو پرتله د پاکستان لپاره تر ټولو خونړی کال وي.
