د المرصاد په نوم يوې رسنۍ د استخباراتي سرچينو له قوله راپور ورکړی چې د پاکستان په کراچۍ ښار کې د حسن په نوم د داعش خراسان څانګې يو جګ پوړی مشر وژل شوی.
د يادې رسنۍ په راپور کې دا نه دي ويل شوي چې نوموړی څنګه او د چا له خوا وژل شوی، خو د استخباراتي سرچينو په حواله یې زياته کړې چې د حسن وژل کېدل په کراچۍ د داعش او ځينو نورو ډلو موجوديت ثابتوي.
په راپور کې د سرچينو له ادرسه ويل شوي، حسن په دې وروستيو کې په افغانستان کې د ځينو بريدونو ترسره کولو ته چمتووالی نيولی و.
د المرصاد په راپور کې زیاته شوې: « ناڅرګندو وسله والو د پاکستان په بندري ښار کراچۍ کې د داعش خراسان ډلې یو لوړ پوړی قومندان په ډزو وژلی. وژل شوی کس چې په پراخه کچه د حسن په نوم پېژندل کېده، د دې ډلې یو له مشهورو فعالانو ګڼل کېده. که څه هم د داعش خراسان اصلي مرکز په بلوچستان کې دی، خو حسن د خیبر پښتونخوا له پېښور څخه و او د یوه روزل شوي او ځیرک فعال په توګه يې فعاليتونه کول او د دې ډلې په لویو عملیاتو کې ښکیل و.»
د افغانستان سولې لپاره د امریکا پخواني ځانګړي استازي زلمي خلیلزاد هم د حسن وژل کېدو ته د پوښتنې په توګه اشاره کړې او ويلي يې دي چې نوموړی د داعش په ليکو کې څومره مهم و او په کراچۍ کې يې څه کول؟
خلیلزاد له دې وړاندې ادعا کړې وه چې داعش او ځينې نورې ډلې لا هم په پاکستان کې دي او ټينګار يې درلود چې دا هېواد باید په خپله خاوره کې د يادو ډلو پر وړاندې جدي اقدامات وکړي.
د چارو شنونکي په پاکستان کې د يادو ډلو موجوديت يوازې د دې هېواد لپاره نه بلکې د ټولې سيمې لپاره ګواښ ګڼي او غوښتنه کوي چې پاکستان دې يې پر وړاندې پرېکنده عمل وکړي.
د سیاسي چارو شنونکی ادریس محمدي ځاځی وايي: « نړیوال باید په دې اړه وضاحت وغواړي او پاکستان باید سپیناوی وکړي، ترڅو ښکاره شي چې ملامت او سلامت څوک دي. باید په ډاګه شي چې د دې ډلو ټپلو آدرسونه چېرې دي، روزنه او تمویل یې د چا له خوا کېږي.»
د حسن په نوم د داعش دغه مهم غړی داسې مهال په کراچۍ کې وژل کېږي چې همدا تېره مياشت د پاکستان دفاع وزير خواجه اصف اعتراف وکړ چې هېواد يې تېرو څو لسيزو کې د لوېديځ په غوښتنه په افغانستان کې د ځينو وسله والو ډلو ملاتړ کاوه.
ځينې شنونکي دېته په پام له ملګرو ملتونو غوښتنه کوي چې د سيمې امنيتي ثبات د دوام لپاره پر پاکستان فشارونه ډېر کړي.
د پوځي چارو کارپوه توریالی ځاځی وايي: « موږ باید اوس خپلې خاورې او هېواد ته متوجه شو، زموږ یې د خلیلزاد او نورو په خبرو او ادعاوو څه! دا ټولو ته معلومه ده چې پاکستان د ترهګرو ډلو ځاله او مرکز دی. پاکستان دغه ډلې له نړیوالو څخه د کرېډېټ اخستو لپاره جوړوي.»
د نړیوالو اړیکو شنونکی نجیب الرحمن شمال وايي: « د داعش ډله د پاکستان په داخل کې فعالیت لري او دې موضوع د سیمې او ګاونډ هېوادونو ته اندېښنې جوړې کړې دي. په پاکستان کې د دې ډلې موجودیت له پاکستان سره د نورو هېوادونو د مناسباتو خرابېدو سبب هم شوی دی.»
د روان ۲۰۲۵ زېږدیز کال د جنوري په۲۲مه د افغانستان حکومت امنیتي او تصفیوي کمیسیون کلني راپور کې ویلي و چې پاکستان په بلوچستان او قبایلو سیمو کې د داعش روزنه کوي او د دې ډلې هغه جنګیالي چې په سوریه او نورو هېوادونو کې پاتې دي، د کراچۍ او اسلام اباد هوايي ډګرونو په وسيله پاکستان ته لېږدول کېږي او بيا په بلوچستان او پاکستان تر کنټرول لاندې خيبرپښتونخوا کې ځای پرځای کېږي.
