د افغانستان سولې لپاره د امریکا پخواني ځانګړي استازي یوځل بیا د پاکستان له اوسني حکومت غوښتي چې پخوانی لومړی وزیر عمران خان ازاد او د هغه د پلویانو غږ واوري.
زلمي خلیلزاد خبرداری ورکړی چې که د پاکستان حکومت د عمران خان پلویانو غږ وا نه وري، ښایي منفي ولري. هغه دا څرګندونې په پېښور کې د تحریک انصاف ګوند وروستۍ جلسې ته په اشارې کړې. خلیلزاد زیاته کړې، د پاکستان حکومت باید د خپلو خلکو غوښتنو او سولې ته پام وکړي.
د افغانستان سولې لپاره د امریکا پخواني ځانګړي استازي زلمي خلیلزاد ویلي: « د تحریک انصاف ګوند وروستۍ جلسې ته په کتو چې په پراخه کچه خلکو په کې ګډون کړی و، دا ښکاري چې خلک غواړي نور عمران له بنده را خوشی شي؛ له هند سره جګړې هم دا حقیقت پټ نه کړ. د پاکستان اوسني واکمنان باید د خپلو خلکو غږ واوري او درناوی یې وکړي. عمران خان باید ازاد کړای شي او ملي روغې جوړې ته کار وشي.»
دغه راز، خلیلزاد خبرداری ورکړی چې که د پاکستان اوسني واکمنان د خپلو خلکو غږ ته پام ونه کړي، نو هلته به سیاسي بې ثباتي نور هم زياته شي.
د چارو څارونکي بیا وایي، د پاکستان اوسنی سیاسي وضعیت له هر اړخه د بحران خواته روان دی او په خبره یې، که حکومت یې د خلکو غوښتنو ته پام ونه کړي، ښایي بدې پایلې ولري.
د سیاسي چارو شنونکی معین ګل څمکنی په دې اړه وايي: « عمران خان له ټول ملت څخه استازیتوب کولی شي او د عمران خان ګوند هم کوم فامیلي ګوند نه دی بلکې یو ولسي ګوند دی. نو په دې اساس غواړي چې یو داسې څوک رامخکې شي چې د سیمې په کچه یوه ښه پالیسي تدوین کړي او مخ ته یې یوسي. زموږ نظر همدا دی چې د حکومت په سطحه باید بدلون راشي، ترڅو له افغانستان سره اړیکې جوړې کړي او په سیمه کې سوله او ثبات تأمین شي.»
د چارو یو شمېر نور څارونکي بیا وایي، زلمي خلیلزاد د پاکستان حکومت ته یوه مشوره ورکړې، که یې ومني ښایي ډېرې ستونزې یې ورسره هوارې شي.
د نړیوالو چارو شنونکی واحد فقیري وایي: « پاکستان ته د ښاغلي خلیلزاد دا توصیه چې عمران خان باید راخوشی شي او له پاکستانیانو سره ملي ډیالوګ پیل شي، زه فکر کوم تر ټولو غوره مشوره ده. که پاکستان غواړي خپل داخلي مشکلات حل کړي او د خپلو درېیو بحرانونو چې اقتصادي، امنیتي او سیاسي دي، د دوی غم وخوري؛ د پاکستان حکومت مجبور او مکلف دی چې له خپلو خلکو سره جرګې ته کېني.»
د ځینو بیا باور دا دی چې د پاکستان روان سیاسي وضعیت له بحراني حالت هم ور تېر شوی او که یې حکومت مخه ونه نیسي، هغه ورځ لرې نه ده چې په پاکستان کې سیاسي بې ثباتي لا پراخه شي.
د سیاسي چارو شنونکی سلیم پیګیر په دې اړه وايي: « پاکستان د بې ثباتۍ خواته روان نه دی بلکې پاکستان بې ثباته دی. دا مهال اقتصادي ثبات نه لري، سیاسي او نظامي ثبات نه لري. بنا ً، ښاغلي خلیلزاد ښه خبره کړې چې حکومت یې باید د پاکستان د خلکو برحق غږ ته مثبت ځواب ورکړي.»
د پاکستان پخوانی لومړی وزیر او د تحریک انصاف ګوند بنسټ اېښودونکی عمران خان دوه کاله مخکې د ۲۰۲۳ کال د اګست په پنځمه په لاهور کې ونیول شو او د دې هېواد یوې محکمې د فساد قضیه کې په دری کاله زندان محکوم کړ.
په زندان کې د نوموړي دوو کلونو تېرېدو په مناسبت د اګست په پنځمه د نوموړي ګوند په ټول پاکستان کې د احتجاجونو اعلان کړی و. ځايي مسوولین وايي، د پېښور ښار په بېلابېلو سیمو کې به اضافي پولیس ځواک ځای پر ځای کړي.
د راولپنډۍ سیمې اډیاله نومي زندان په شاوخوا کې هم د اضافي ځواک ځای پر ځای کولو راپورونه ورکړل شوي؛ دا هغه زندان دی چې عمران خان په کې د بند موده تېروي.
