د جوزجان ولایت په مرکز شبرغان ښار کې له تېرو څه باندې درېیو کالو راهیسې ګڼ شمېر لویې او کوچنۍ تولیدي کارخونې فعالې شوې چې تر ټولو تازه یې د بخار دېګونو جوړولو کارخانه ده.
دلته د جوړو شویو کارخونو مسوولین وايي، که اسانتیاوې ورته ډېرې شي او ملاتړ يې وشي، د ډېر شمېر ځوانانو لپاره به کاري فرصتونه برابر کړي.
د بخار دېګونو کارخونې مسوول مدیر سید قدیر وايي: « برېښنا لرو، خو د ګازو له پلوه ستونزې شته، بله دا چې زموږ خام مواد هم په کور دننه چمتو کېږي. له اسلامي امارت او په ځانګړې توګه د جوزجان له ولایتي مسوولینو غواړو چې زموږ د ګازو ستونزې ته رسېدنه وکړي. په ۲۴ ساعتونو کې چې موږ څومره ګاز ته اړتیا لرو، نه راکول کېږي. که حکومت مو ملاتړ وکړي له ۲۵۰ تر ۳۰۰ کسانو ته د کار زمینه برابرولی شو او دغه راز کولی شو خپل توکي بهر ته هم صادر کړو.»
په همدې حال کې د جوزجان د صنعت او سوداګرۍ ریاست مسوولین د کارخونو د فعالیت پیل کېدل د اقتصادي ودې او د بې کارۍ کچې ټیټېدو په برخه کې اغېزناک اقدام بولي.
د جوزجان صنعت او سوداګرۍ رییس نیاز محمد تواب وايي:« د جوزجان ولایت ټولو سوداګرو او پانګوالو ته ډاډ ورکوو چې د خپلو ستونزو په اړه موږ ته مراجعه وکړي، موږ به یې له مرکزي چارواکو سره شریکې کړو او د دوی مشکلاتو ته به رسېدنهن کوو. دا مهال د ټول هېواد پر کچه اقتصادي مسایلو ته ډېره پاملرنه کېږي.»
کارخونو کې پر کار بوخت کسان خوښي څرګندوي چې د کار زمینه ورته برابره شوې.
دوی له ملي سوداګرو غواړي چې په کوردننه د ورته کارخونو په جوړولو سره بهر ته د کار کولو لپاره د ځوانانو د تګ مخه ونیسي.
د کارخونې یو تن کارګر وايي: « له پانګوالو مې غوښتنه دا ده چې اوس شکر امنیت شته او د شبرغان په څېر ولایتونو کې ګاز او برق هم شته دي، نو راشئ او دلته پانګونه وکړي.»
د کار خونې یو بل کارګر وايي: « زه ایران کې وم، له هغه ځایه اخراج شوم او په کور وزګار کېناستم. اوس مې په دې کارخونه کې کار پيل کړی او ډېر خوښ یم چې کار لرم.»
د ښيښې، ګچ، بخار دېګونو او غالیو تولیدولو کارخونې دا مهال په جوزجان ولایت کې فعالیت لري.
له دې ټولو سربېره، د جوزجان والي په دې ولایت کې د صنعت برخه کې له خپلو هر راز همکاریو ډاډ ورکوي.
ګل حیدر شفق همداراز زیاتوي جوزجان د ګازو له اړخه بډایه ولایت دی او د تولیدي کارخونو لپاره مناسب دی.
شفق په دې اړه وايي:« د صنعتکارانو لپاره صنعیتي پارک، امنیت، برېښنا او ګازو ته اړتیا ده. الحمد الله ښه برق او ګاز لرو؛ موږ په خپلو ملي تجارانو که خارج کې دي که داخل کې، غږ کوو چې تاسو لپاره د کار او صنعت زمینه برابره ده او تاسو کولی شئ خپل تولیدات او وطن او ولس ته وړاندې کړئ، اسلامي امارت له تاسو سره همکار دی.»
د جوزجان صنعت او سوداګرۍ ریاست د مالوماتو له مخې، اوس مهال په دې ولایت کې شاوخوا ۸۰ لویې او وړې تولیدي او صنعتي کارخونې فعالې دي چې زرګونه کسان په کې پر کار بوخت دي.
