حوثیانو په یمن کې د انتقالي حکومت غوښتنه وکړه.
د حوثي یاغیانو استازي چې د سولې په خبرو کې د ګډون په موخه سویډن ته تللي وايي، باید داسې حکومت جوړ شي چې ټول ګوندونه په کې برخه ولري.
هغوی په ورته وخت کې د یمن د نیمايي حکومت د ولسمشر الهادي منصور د لرې کیدو غوښتنه هم وکړه.
د سولې په تازه خبرو کې حوثیان په دغه هیواد کې د انتقالي حکومت غوښتونکي شول.
حوثیان وايي، داسې حکومت باید جوړ شي چې ټول سیاسي ګوندونه پکې برخه ولري.
محمد عبدالسلام د سولې خبرو کې د حوثیانو استازی وویل، ((زموږ له لورې یوه سیاسي حل لار دا هم ده چې انتقالي حکومت جوړ شي. دا حکومت باید تر ټاکلي وخت پورې وي، دا حکومت یو ولسمشر ولري او په لاندې مواردو ولاړ وي، امنیت ولري، پوځي عملیات وشي، د ټول یمن واک ولري، هغه ستونزې حل کړي چې ناحل پاتې دي. ځکه تر دې وړاندې سیاسي حل موجود نه و.))
حوثیان د حدیده ښار لپاره هم اندیښمن دي او وايي، له ملګرو ملتونو سره په ګډه کار کوي چې د حدیدې ښار کار هم یو طرفه کړي او خلک د لوږې له ستونزو وژغوري.
محمد عبدالسلام وویل، ((دلته زموږ یو ټیم له ملګرو ملتونو سره په ګډه کار کوي چې وضعیت ارام کړي، دا ټیم د عمومي حالت د تغییر هڅه کوي، خو د دوی لومړیتوب حدیده ده. دا هرڅه به موږ څنګه کوو،؟ موږ دا کارونه هغه وخت کولای شو چې هلته پوځي عملیات ختم شي، او پردۍ جګړه له دغې سیمې ووځي.))
حوثیان د یمن حکومت د اوسني ولسمشر هادي المنصور د لرې کیدو غوښتنه هم کوي خو حکومتي استازي وايي، دا ستونزه د هغه په لرې کیدو نه حل کیږي.
د حوثیانو استازي دا خبرې وروسته له هغې کوي چې حکومت له دوی غوښتي و چې هوايي ډګر هغوی ته پریږدي خو حوثیانو ورسره و نه منله.
