محمد ناصر الکوزی چې د هرات انجینرۍ پوهنځي زده کړیال دی، توانیدلی چې په لږو امکاناتو د برېښنا تولید لپاره د اوبو کوچنی بند جوړ کړي.
دغه بند اوس مهال د ۲.۹۰ واټ برښنا تولیدولو ظرفیت لري.
په همدې حال کې د یادې برخې نور زده کړیالان ډاډ ورکوي، که سرپرست حکومت يې ملاتړ وکړي، د امکاناتو له لرلو وروسته به بېلا بېل توکي جوړ کړي.
زده کړیال فېروز عزیزي وايي: « غوښتنه مو له دولت داده، کوم محصلین چې د ټېکنالوژۍ او پرمختګ په برخه کې ګام اخلي، مالي ملاتړ یې وکړي؛ ځکه محصلین هم کار کوي هم درس وایي. په دې سره به یې اقتصادي وضعیت ښه شي.»
یو بل زده کړیال عبدالهادي وايي: « غوښتنې زیاتي دي، خو کوم محصلین چې زموږ په شان آیډیا او فکر لري، که شرایط ورته برابر شي، کولی شي دې برخه کې کار وکړي او لاسته راوړنې ولري.»
له بلې خوا، مسوولین د پرمختګ لپاره د عصري علومو پر اهمیت ټینګار کوي او ډاډ ورکوي چې د دې ډول ځوانانو او زده کړیالانو ملاتړ ته ژمن دي.
د کورنیو چارو وزارت د داخلي امنیت آمر سلطان احمد مفکر وايي: « کله چې ستا دوښمن په هر قوت سمبال وي، هغه مقابل کې به تیاری کوې، هغه که د نظام وي که د وخت استخبارات وي، په مقابل کې به یې استخبارات برابروې؛ هغه که د ټېکنالوژۍ وي، مقابل کې به یې د ټېکنالوژۍ قوت برابروې، که اقتصادي وي مقابل کې به یې اقتصاد باندي کار کوې.»
د هرات والي شیخ نور احمد اسلام جار وايي:« د سیمه ییزي ادارې تر امکاناتو او وس پورې یې ملاتړي یو. کومه مادي همکاري چې مو په وسه وي، محصلینو سره به یې کوو.»
د یادونې وړ ده چې یاد نندارتون کې د درېیو ورځو لپاره ۳۰ غرفو کې د هرات پوهنتون د انجینرۍ پوهنځۍ محصلینو له خوا جوړ شوي ټېکنالوژیکي توکي نندارې ته وړاندې شوي دي.
