امريکا ته د پاکستان پوځ لوی درستز عاصم منير له سفرسره سم، د پاکستان حکومت اعلان وکړ چې د ۲۰۲۶ کال د سولې نوبل جايزې ته يې د امريکا ولسمشر ډونالډ ټرمپ رسما نوماند کړ.
خو له دې څو ورځې وروسته د پاکستان له لوري يادې جايزې ته نوماند شوي ډونالډ ټرمپ پر ايران بريد وکړ او په دې توګه يې د پاکستان اراده او پرېکړه د سولې او جګړې ترمنځ له تضاد سره مخ کړه چې پر وړاندې يې د پاکستاني سياستوالو ترمنځ اختلاف زيات او د يادې پرېکړې د بېرته اخيستلو غوښتنې یې مطرح کړې.
خو پر دې حساسيتونو سربېره هم د پاکستان دفاع وزير په يوه تازه مرکه کې د سولې نوبل جايزې ته ډونالډ ټرمپ تر بل هر چا مناسب کس ياد کړی او ويلي يې دي چې نوموړي وکولی شول د ايران او اسرایيلو جګړه ودروي.
د پاکستان دفاع وزیر خواجه اصف ویلي: « موږ د سولې نوبل جایزې ته د ډونالډ ټرمپ په نوماندولو لا هم باوري یو؛ ځکه هغه د هند او پاکستان او اوس د ایران او اسراییلو ترمنځ یوه تاریخي اوربند ته لاره جوړه کړه. تاسې پوهېږئ چې د ایران او اسراییلو ترمنځ جګړه لا پراخېده، خو ټرمپ یې مخه ونیوله. هغه د یوې جګړې پر ځای د دوو تاریخي جګړو مخه ډپ کړه او دا یو بې ساری ګام دی.»
له دې وړاندې د پاکستان د جمعيت علمای اسلام ګوند مشر مولانا فضل الرحمن د سولې نوبل جايزې ته د پاکستان له لوري د ډونالډ ټرمپ نومولو پرېکړه ننګولې وه او د شهباز شريف پرمشرۍ يې د دې هېواد له حکومت غوښتې و چې پر ايران د بريد او پر تاوتريخوالي د لاس پورې کولو له امله د ټرمپ په اړه کړې پرېکړه بېرته واخلي.
فضل الرحمن په دې اړه ویلي: « د ټرمپ له لاسونو څخه همدا اوس په افغانستان کې د مسلمانانو د وژلو له وجې وينې څاڅي. همدارنګه د عراق، فلسطين او پر ايران د بريد له امله يې لاسونه د خلکو په وينو سره دي. ټرمپ د وينې بهولو لامل شوی او نړيوال قوانین يې نقض کړي دي. موږ په ښکاره د ايران ملاتړ کوو، که د ايران ملاتړ ونه کړو، نو د اسرایيلو ملاتړ وکړو؟»
د پوځي چارو شنونکي په تېر کې د امريکا د ګټو پر وړاندې د پاکستان رول ته په اشارې وايي، ښايي په راتلونکي کې هم د امريکا د ګټو تحقق لپاره پر تشدد ولاړې ځينې پروژې وسپارل شي او له همدې کبله د پاکستان پر پرېکړې د نيوکې ترڅنګ ټرمپ د سولې نوبل جايزې لپاره وړ نه بولي.
د پوځي چارو شنونکی توریالی ځاځی وايي: « له بلې خوا، د ټرمپ په راتګ سره په منځني ختیځ او منځنۍ آسیا کې د ایران او اسراییلو ترمنځ جګړه په خپله یو جنایت دی. په هېڅ صورت دا امکان نه لري چې ټرمپ ته د نوبل جایزه ورکړل شي؛ ځکه چې ټرمپ خپله امریکا کې هم د جنايي جرمونو څو دوسیې لري او له همدې امله ویلی شم چې د پاکستان د دفاع وزیر خبره د تمسخر او خندا وړ ده.»
ځينې نور بیا د ټرمپ نومونې په اړه د پاکستان دفاع وزیرڅرګندونې نمایشي بولي او ټینګار لري چې پاکستان اوس مهال په سیاسي، اقتصادي، امنیتي برخه کې له ننګونو سره مخ دی او نوبل جايزې ته د ولسمشر ټرمپ نوماندولو په څېر له تاکتيکونو امريکا ته د ځان نږدې کولو هڅه کوي.
د نړیوالو اړیکو شنونکی سمیرانګار وايي: « دا یو نمایشي او فرصت طلبانه حرکت دی او هدف یې ځان ته د نړیوالو پام اړونه او له حالاتو سیاسي امتیاز اخیستنه ده. پاکستان هېڅکله په سیمه کې د سولې په تړاو صداقت نه لري»
د سیاسي چارو شنونکی ادریس محمدي ځاځی وايي: « ټرمپ په خپل ځای پرېږده، زما په اند د نوبل جایزه باید هېڅ امریکايي ته ورنه کړل شي. د همدوی له لاسه د نړۍ ډېر هېوادونه د جګړې په دروازه کې ولاړ دي. نړیوال بشري، اقتصادي او سیاسي ناورینونه ټول د دوی له لاسه دي.»
پاکستان داسې مهال د امريکا ولسشمر ډونالډ ټرمپ د سولې نوبل جايزې لپاره نوماند کړی چې دوې میاشتې وړاندې د بشري حقونو د نقض له امله د امريکا کانګرېس ته د پاکستان د پوځ لوی درستیز پرسفر د بندیز ارزونې طرحه سپارل شوې.
عاصم منير که څه هم د سفر په برخه کې له محدوديت سره مخ دی، خو پر دې سربېره يې هم په روانه جون میاشت کې په سپينه ماڼۍ کې له ولسمشر ډونالډ ټرمپ سره د غرمې ډوډۍ وخوړه.
