د اداري اصلاحاتو او ملکي خدمتونو ادارې په چوکاټ کې د الکټرونیکي پروسې له لارې د ګومارنو نوی سیسټم پرانیستل شو.
د دې ادارې چارواکي وايي، د دې سیسټم پر مټ به دولتي ادارو ته جذب او ګومارنې چارې په اسانۍ او د وخت له ضایع کېدو پرته ترسره شي.
د دوی په خبره، له دې نوي الکټرونیکي سیسټم یا ډېټابېس سره به په ازموینو کې روڼتیا رامنځته شي او هېڅوک به نه شي کولی چې لاسوهنه په کې وکړي.
د چارواکو د مالوماتو له مخې، د الکټرونیکي پروسې له لارې د ګومارنو د دې سیسټم په وسيله به ټول واجد شرایط کسان کولی شي چې له هر ولایت او له هرې ولسوالۍ په ازموینو کې په اسانۍ سره ګډون وکړي او خپله پایله ترلاسه کړي.
