د ایران پر درېیو اټومي تاسیساتو فردو، نطنز او اصفهان د امریکا له هوايي بریدونو او ورپسې په قطر کې د امریکا پر العدید پوځي اډې د ایران له خوا تر ځوابي بریدونو وروسته، د امریکا ولسشمر د اسراییلو او ایران ترمنځ د اوربند خبر ورکړ.
ډونالډ ټرمپ د تروت سوشیال خواله رسنۍ په یوه پوسټ کې تر راتلونکو۲۴ ساعتونو د بشپړ اوربند ویلي و او له دواړو خواوو یې غوښتي و چې د هغه له وړاندیز شوې طرحې سره سم یې عملي کړي.
طرح دا وه چې ایران تر شپږو راتلونکو ساعتونو اوربند کوي چې له هغې وروسته تر دولسو ساعتونو به اسراییل اوربند کوي چې په پایله کې یې په ۲۴ ساعتونو کې د دواړو خواوو ترمنځ اوربند کېږي.
نوموړي څو ساعته وروسته په یوه بل پوسټ کې په بشپړ ډول د اوربند د ټینګښت خبر ورکړ او له دواړو خواوو یې وغوښتل چې مات یې نه کړي.
د امریکا ولسمشر ډونالډ ټرمپ ویلي: « اوربند ترسره شو. هیلهکوم! مات یې نه کړئ.»
اسراییلي لوري که څه هم په سر کې په دې اړه له نظر ورکولو ډډه کړې وه، خو له څه ځنډ وروسته یې د اوربند عملي کېدل ومنل، خو په ورته مهال یې د هرډول نقض پر وړاندې د پوره چمتوالي خبرداری ورکړ.
له دې خبر وروسته په داسې حال کې چې نړۍ د دواړو لوریو ترمنځ عملي اوربند ته چمتو کېده، د اسراییلو دفاع وزیر ایران تورن کړ چې کواګي د فلسطین پر اشغال شویو سیمو یې درانه توغندیز بریدونه کړي چې له امله یې اوربند نقض شوی دی.
د دې هېواد دفاع وزارت او پوځ له دې کبله ایران ته د ځواکمنو ځوابي بریدونو ګواښ وکړ.
د اسراییلو دفاع وزیر اسراییل کاتز ویلي: « د اسراییل پوځ ته مې امر وکړ چې د ایران له لوري د اوربند ماتولو له کبله د تهران په زړه کې واکمن رژیم ته په ځواکمنو بریدونو ځواب ورکړي.»
بل پلو، د جګړې مقابل لوري ایران په سر کې د ټرمپ د وړاندیز شوي اوربند په تړاو چوپتیا غوره کړې وه او دې هېواد د بهرنیو چارو وزیر سیدعباس عراقچي حتا دا خبره تکذیب کړه او وویل، د اوربند او د پوځي عملیاتو د درولو په تړاو هېڅ راز هوکړه نه ده شوې.
خو د اوربند د نقض کېدو په تړاو د اسراییل دفاع وزارت له ادعاوو وروسته تهران په غیر رسمي ډول اوربند ومانه او د تحمیلي اوربند نوم یې ورکړ چې په خپلسري ډول د امریکا او اسراییل له لوري اعلان شوی او له دې وړاندې یې ایران د جګړې او تسلیمۍ ګواښونه کول.
د ایران بهرنیو چارو وزیر په یو ټویټ کې وویل ، هغه مهال خپل بریدونه دروي چې مقابل لوری خپل بریدونه په بشپړه توګه ودروي.
ایران د اوربند نقضول په کلکه رد کړل او د دې ادعا خلاف یې اسراییل تورن کړی چې له اوربند وروسته یې هم پر ایران بریدونه نه دي درولي.
د ايران خاتمالانبیا مرکزي قرارګاه ویلي: « اسراییلو نن د سهار ۹ بجې درې پړاوه بریدونه وکړل، ځواب به یې ورکړو. د ایران وسله والو ځواکونو له دې وړاندې ویلي و چې هېڅ راز یرغل به بې ځواب پرې نه ږدي. اسراییل به لوړه بیه پرې کړي.»
له دې وړاندې د ایران ولسمشر مسعود پزشکیان په یوه ټویټ کې ویلي و چې ایران د جګړې پیلوونکی نه دی، خو په وینا یې هېڅ یرغل به بې ځوابه پرې نه ږدي.
تر دې وړاندې دواړو خواوو پر یو بل د کلکو ګوزارونو خبر ورکړی و.
اسراییلو وویل، جنګي الوتکو یې د ایران په لوېدیځ کې د استخباراتي مالوماتو پر اساس پر پوځي تاسیساتو بریدونه کړي.
ایران بیا په اشغال شوې بیرالسبع سیمه کې پر اسراییلي اهدافو توغندیز بریدونه کړي چې درنه مرګ ژوبله یې اړولې.
وبه لیدل شي چې ایران او اسراییلو ترمنځ د جګړې او اوربند مساله تر کومه غځیږي.
