له ایران د امریکا ولسمشر ډونالډ ټرمپ “بې قیده او شرطه تسلیمۍ” غوښتنې سربېره د ایران او اسراییلو هوایي جګړې شپږمه ورځ هم دوام درلود.
ټرمپ پر خپله اېکس پاڼه لیکلي، د ایران مشر چېرته دی او کولی شو په اسانۍ سره یې هدف وګرځوو؛ خو اوس دا کار نه کوو.
ټرمپ زیاته کړې:« دی یو اسان هدف دی. خو همالته خوندي دی، موږ یې نه راباسو (نه یې وژنو!) لږ تر لږه د اوس لپاره نه.»
ټرمپ له دې خبر څو شېبې وروسته پر خپل اېکس ولیکل، له (قید او شرط پرته تسلیمي)، چې موخه یې له تهران خپله وروستۍ غوښتنه ښیي.
له دې هر څه سره سره د د اسراییلو او ایران ترمنځ د جګړې پر شپږمه ورځ هم دواړو هېوادونو پر یو بل د راکټي بریدونو ادعا کړې.
د اسراییلو پوځ په یوه خبرپاڼه کې ویلي، د چهارشنبې سهار لومړیو ساعتونو کې پر دغه هېواد د ایران توغندیز بریدونه شوي او د تل ابیب په هوا کې د چاودنو غږونه اورېدل شوې دي.
د خبرپاڼې یوه برخه:« نن یو ځل بیا د سهار لومړیو ساعتونو کې د اسراییلو پر یو شمېر ښارونو د ایران توغندیز بریدونه شوي او د دغه هېواد پلازمېنې تلابیب په هوا کې خنثی شوي دي.»
یو شمېر ایراني رسنیو بیا راپور ورکړی چې د تېرې شپې راهیسې د دغه هېواد په یو شمېر مهمو پوځي مرکزونو د اسراییلي رژیم له لوري هوایي بریدونه شوې چې له کبله یې مرګ ژوبله هم اوښتې.
د ایران نیمه دولتي خبري اژانس مهر ویلي:« اسراییلو په تازه بریدونو کې د ایران د انقلابي ګارډ اړوند یو پوهنتون او تهران ته نېږدې د خوجیر بالسټیکي توغندیو مرکز هدف ګرځولي دي.»
د یادونې وړ ده چې د اسراییلو او ایران ترمنځ د تازه پیل شوې جګړې له پیله تر دې دمه د ایراني او نورو نړیوالو رسنیو د راپورونو پر پربنسټ چې د یادو هېوادونو د چارواکو د مالوماتو پر اساس خپاره کړي د اسراییلي ځواکونو په هوایي بریدونو کې شاوخوا ۲۲۴ ایراني وګړي چې ډېری یې ملکيان دي، وژل شوي.
د ایران پر څو مهمو ښارونو د اسراییل له بریدونو وروسته ایراني چارواکو ادعاوې کړي چې پر اسراییلو یې شاوخوا ۴۰۰ توغندي توغولي چې ۱۰ سلنه یې هدف ته رسیدلي چې ۲۴ اسراییلیان په کې وژل شوې دي.
