پر ایران د اسراییلو د جمعې ورځې له هوايي او هدفي بریدونو وروسته چې د دې هېواد مهم پوځي چارواکي، اټومي ساينسپوهان او هستوي تأسیسات یې پر نښه کړل او په کې د ۲۰ لوړ پوړو پوځي چارواکو او اټمي ساینس پوهانو په ګډون، لسګونه تنه مړه او ټپیان شول، ایران هم پر اسرایيلو د غچ اخيستنې متقابل بریدونه کړي.
د ایران پوځ وايي، په پراخو ډرون او توغندیزو بریدونو کې یې د اسراییلو پوځي مرکزونه او هوايي اډې پر نښه کړي چې له امله یې د څلور تنو وژل کېدو او شاوخوا ۱۰۰ نورو ژوبلېدو پخلی شوی.
د اسراییلو روغتیايي چارواکو ویلي، د ځینو ژوبلو شویو کسانو روغتیايي حالت نازک دی.
د ایران مذهبي مشر آیت الله علي خامنه یي ویلي، د اسراییلو ضد عملیات به د اړتیا تر وخته دوام ولري او په وینا يې، اسراییلو ته به غاښ ماتوونکی ځواب حتمي ورکوي.
خامنه يي زیاته کړې: « صهیونېستي رژیم لویه تېروتنه وکړه، ستره خطا یې وکړه. داسې غلطي یې وکړه چې ناوړه پایلې به یې د خدای په توفیق سره دوی بېچاره کړي. د ایران ملت د خپلو پاکو شهیدانو له وینو نه تېرېږي او نه به هم د خپل هېواد پر هوايي حریم یرغل وزغمي.»
د اسراییلو لومړي وزیر هم په يوه تازه ویډیو کې ویلي، پر ایران له برید یې موخه د دې هېواد د اټومي پروګرام او بالسټیک توغندیو د ګواښ له منځه وړل دي او په وینا یې خپلې دې موخې ته د رسېدو په حال کې دی.
بنیامین نتنیاهو د ایران پر وړاندې د اسراییلو د ورته عملیاتو د دوام خبرداری ورکړی او ویلي يې دي چې ایران اوس درک کړې چې له څه ډول ځواک سره مخ دی.
پر ایران د اسراییلو په تازه بریدونو کې د تهران مهرآباد هوايي ډګر، د همدان ولایت ځينې مهمې برخې، د نطنز او فردو هسته يي تأسیسات او ګڼې برخې په نښه شوې چې د پوځ د عملیاتو او اطلاعاتو د دوو مرستیالانو په ګډون په کې نږدې۱۰ کسان وژل شوي.
د اسراییلو لومړي وزیر بنیامین نتنیاهو ویلي: « د اسراییلو د بریدونو اصلي موخه د ایران د واکمن رژیم له لوري د اټوومي پروګرام او بالسټیک توغندیو د ګواښ له منځه وړل دي. په داسې حال کې چې خپلو موخو ته د رسېدو په حال کې یو، تاسو ته هم آزادۍ ته د رسېدو لاره هواره وو. په تېرو ۲۴ساعتونو کې مو د ایران لوړپوړي پوځي قوماندانان، د اټومي پروګرام ساينسپوهان، د اټومي او د بالسټیک توغندیو تأسیسات له منځه یوړل. زموږ عملیات لا پاتي دي. د ایران رژیم نه پوهېږي چې له څه ډول ځواک سره مخ دی او یا څه ډول ځواک به دوی ته ګوزار ورکړي؟ د ایران رژیم له دې وړاندې په دې کچه کمزوری نه و.»
پر ایران له بریدونو وروسته د دې هېواد بهرنیو چارو وزارت له امریکا سره د اټومي پروګرام په اړه هر راز خبرې اترې او مذاکرات بې ګټې بللي او دا هېواد یې له اسراییلو پر ملاتړ تورن کړی.
د یاد وزارت ویاند ویلي، اسرائیلو په دې برید کې ټولې سرې کرښې له منځه وړي، له همدې کبله دا ناشونې ده چې مذاکرات او جګړه دې په یوه وخت کې ترسره شي.
د ایران بهرنیو چارو وزارت ویاند اسماعیل بقايي ویلي: « مقابل لوري داسې څه وکړل چې خبرې اترې بې ګټې شوې. تاسو نه شئ کولی هم د مذاکراتو ترسره کولو ادعا وکړئ او هم اجازه ورکړئ چې د اسرائیلو نسل وژونکی رژیم د ایران ځمکنۍ بشپړتیا په نښه کړي. دا روښانه ده چې اسرائیل به د امریکا له اجازې پرته دغه جنایت ترسره نه کړي.»
د ملګرو ملتونو امنیت شورا هم په دې اړه بېړنۍ ناسته کړې.
ایران له ځانه د دفاع او غبرګون ګوتڅنډنې په کې کړي، خو د امریکا استازي ویلي، ایران باید اټومي وسلو ته لاسرسی پیدا نه کړي.
بل پلو بیا د چین، روسیې او پاکستان استازو پر ايران د اسراییلو بریدونه غندلي او له ښکېلو لورو یې د صبر او زغم غوښتنه کړې.
همدارنګه د ملګرو ملتونو سرمنشي د جګړو احتمالي پراخېدو له امله اندېښنه ښودلې او د ډېپلوماسۍ او خبرو اترو له لارې یې د ستونزو د حل غوښتنه کړې.
د ملګرو ملتونو سرمنشي انټونيو ګوټېرېش ویلي: « د اسراییلو له لوري د ایران اټومي تأسیسات بمبار شوي او ایران هم پر تل ابیب هوايي بریدونه کړي. د جګړو پراخېدل نور بس دی. د دې وخت رارسېدلی چې دا جګړه پای ومومي. سوله او ډېپلوماسي باید ګټونکي شي.»
ایران امریکا، بریټانیا او فرانسې ته خبرداری ورکړی چې له اسراییلو د دفاع په صورت کې به یې په منځني ختیځ کې پوځي اډې پر نښه کړي.
خو امریکا ویلي، که ایران په سیمه کې د دې هېواد ملي ګټې او پوځیان پر نښه کړي له ناوړه برخلیک سره به يې مخ شي.
دا هرڅه داسې مهال دي چې پر ایران د اسراییلو تر بریدونو وروسته د امریکا ولسمشر ډونالډ ټرمپ ویلي، د بریدونو له پيل کېدو خبر و او له دې کبله یې ښايي اسراییلو ته ۳۰۰ هېلفایر توغندي ورکړي.
