حزب الله اسراييلو ته غځيدلي مخفي تونلونه د ایران په ملاتړ جوړ کړي دي.
د اسرايیلو لومړی وزیر بنیامین نتنیاهو پر حزب الله ډلې تور پورې کوي چې د دغې ډلې د ټولو ترهګریزو فعالیتونو تر شا د ایران لاس دی.
اخوا امریکا له اروپايي ټولنې غواړي چې پر ایران د اټومي پروګرام له امله تازه بندیزونه ولګوي.
اسراييلي ځواکونو تیره ورځ داسې پټ تونلونه وموندل چې حزب الله ډلې له لبنان څخه اسراييلو ته ویستلي دي.
تازه د اسراييلو لومړی وزیر بنیامین نتنیاهو وايي، دا تونلونه د ایران په ملاتړ جوړ شوي دي.
بنیامین نتنیاهو، ((په سرحدي سیمو کې دا ترهګریز تونلونه حزب الله جوړ کړي چې د ایران مستقیم ملاتړ ورسره وو، هغوی سره د ایران مالي ملاتړ هم دی، د هغوی یوازینۍ موخه دا ده چې بې ګناه اسراييل و وژني، دا د اسراييلي حاکمیت سپکاوی او له نړیوالو تړونونو سرغړاوی دی چې موږ ته د منلو وړ نه دی.))
اسرايیلي ځواکونو دغه تونلونه موندلي او له امله یې پر حزب الله او لبنان ګڼ تورونه هم لګولي دي.
پر ایران دا نیوکې داسې مهال کيږي چې امریکا له اروپايي ټولنې هم غوښتي چې پر دغه هیواد بندیزونه ولګوي.
د امریکا د بهرنیو چارو وزارت مشاور برین هووک وویل، ((موږ تمه لرو چې اروپايي ټولنه به هم د ایران پر توغندیز پروګرام د بندیزونو طرحه پاس کړي، هغوی باید پر هغو بنسټونو بندیزونه ولګوي چې د دغه پروګرام ملاتړ کوي. ځکه دا کارونه د ملګرو ملتونو د امنیت شورا له قانون سرغړونه ده.))
پر ایران له اوږدې مودې راهیسې تورونه دي چې د منځني ختیځ هیوادونو په ګڼو کورنیو مسایلو کې لاسوهنه کوي او هڅه کوي چې سیمه نا امنه کړي.
