کندهار کې سوداګر او پانګه وال: له افغانستان بانک غواړو د پیسو اېستلو برخه کې محدودیتونه لرې کړي

په کندهار ولایت کې یو شمېر سوداګر او پانګه وال وايي، بانکي محدودیتونو له ستونزو سره مخ کړي او په خبره یې له افغانستان بانک غواړي، چې د پیسو اېستلو برخه کې محدودیتونه له منځه یوسي. 

کندهار کې یو تن سوداګر وايي:« ټول کاروبار ولاړ دی، ځکه پیسې نه شته، ټوله پانګه مو په بانکونو کې بنده ده، چې پیسې ونه لرو، تجارت او سوداګري به پر څه وکړو. که دا ستونزه همداشان دوام وکړي، زموږ کاروبار به پر ټپه ودرېږي.»

افغانستان بانک له بانکونو د پیسو اېستلو کچه په اوونۍ کې له دوه سوو ډالرو څلورو سوو ته لوړه کړې، خو خصوصي بانکونه لاهم پېرېدونکو ته یوازې دوه سوه ډالر یا شل زره افغانۍ ورکوي.

سوداګر وايي، په بانکونو کې یې پر پیسو د وضع شویو محدودیتونو تر څنګ د سپین بولدک – چمن لارې تړل کېدو سخت زیانونه اړولي دي.

دغه لاره که څه هم د یوې میاشتې تر تړل کېدو وروسته اوونۍ وړاندې د سوداګرو او مسافرو پر مخ خلاصه شوې، خو سوداګر وايي، د دغو زیانونو جبران یې تر ډېره د وس خبره نه ده.

کندهار کې د تازه او وچې مېوې یو تن سوداګر وايي:« تړلو لارو موږ ډېر زیانمن کړي یو، کله به چې د پاکستان لاره بنده شوه، موږ به خپل مالونه د چابهار بندر له لارې لېږدول، خو دا ځل هلته هم ټکس ډېر لوړ شوی وو. موږ ته تړلو لارو ډېر زیان رسولی دی، چې راګرځول یې د ډېر وخت خبره ده.»

اخوا د یاد ولایت د سوداګرۍ خونې مرستیال عبدالباقي بناء هم له پاکستان سره د یوې میاشتې تړلې لارې له امله سوداګرو ته د درنو زیانونو اوښتو خبره کوي.

 هغه زیاته کړه:« د بانکونو تر څنګ موږ تړلو لارو هم ډېر زیانمن کړي یو، پر هر یوه کانټينر به له سلو تر ۱۵۰ ډالرو هره شپه جرمانه راتلله، د سوداګرو مېوې خرابې شوي.»

د سپین بولدک – چمن لاره که څه هم تر یوې میاشتې ځنډ وروسته خلاصه شوې، خو لاهم سوداګر او په خاصه توګه مسافر پر دغه لاره د پراخو بې نظمیو او د پاکستاني پولیسو له لورې د ناسم چلن شکایت کوي.