د روان زېږدیز کال د اپریل پر ۲۲ د هند تر ولکې لاندې جمو او کشمیر پهــلګام سیمه کې پر سیلانیانو د وسلوالو برید کې د یوه نیپالي وګړي په ګډون ۴۳ سیلانیانو ته مرګ ژوبله واوښته.
له پيښې یوه ورځ وروسته نوي ډيلي ادعا وکړه چې برید او د برید طراحانو رېښه د پاکستان له خاورې ده.
سره له دې چې د دې پېښې په تړاو هراړخیزې پلټنې لاهم دوام لري، خو د همدې ادعا په تعقیب تازه رویټرز خبري اژانس د هندي چارواکو له قوله راپور ورکړی چې د دې هېواد امنیتي ځواکونو په جمو او کشمیر کې د وروستي برید په تړاو درې شکمن کسان نیولي چې دوه هغه یې د پاکستان اصلي وګړي دي.
په ورته مهال، د امریکا دفاع وزیرپیټ هیګسټ له خپل هندي سیال سره په ټيلفوني خبرو کې یاده پېښه غندلې او له ترهګرۍ سره د مبارزې په برخه کې یې د نوي ډیلي له دریځ ملاتړ کړی.
هیګسټ زیاته کړې:« امریکا له هند سره ولاړه ده او د دفاع حق لرلو په اړه یې ملاتړ کوي. موږ په جمو او کشمیر کې د شوي ترهګریز برید په اړه خفه یو.»
د هند دفاع وزیر یو ځل بیا د پاکستان حکومت تورن کړی چې د ترهګریزو سازمانونو روزنه او ملاتړ کوي.
راج نات سینګ له نړیوالې ټولنې غوښتي چې د پاکستان دغه ډول کړنې باید وغندي او د مخنیوي په موخه یې ګډ کار وکړي.
سینګ په دې اړه ویلي: « پاکستان تل د ترهګرو سازمانونو روزنه، تمویل او ملاتړ کړی. نړېواله ټولنه باید د دې کرغېړنو ترهګریزو فعالیتونو غندنه وکړي.»
د دې ترڅنګ، د هند بهرنیو چارو وزیر جي شنکر له امریکايي سیال مارکو روبیو سره له خبرو وروسته پر خپله اېکس پاڼه د جمو او کشمير په وروستي برید کې د طراحانو او بریدګرو په محاکمه کولو ټینګار کړی.
شنکر زیته کړې:« د پهلګام ترهګریز برید په اړه مې د امریکا بهرنیو چارو وزیر مارکو روبیو سره خبرې وکړې. د دې برید ترسره کوونکي، ملاتړي او طراحان باید عدالت ته راکښل شي.»
د راپورونو له مخې، هند داسې مهال په جمو او کشمیر کې د تېرې اوونۍ برید په اړه له پاکستان دغچ اخیستنې ګواښونه کوي چې تازه د پاکستان لومړي وزیر شهباز شریف له امریکا غوښتي چې پر نوي ډیلي فشار راوړي، ترڅو له ګواښونو لاس واخلي.
دوه ورځې وړاندې د هند لومړي وزیر د دې هېواد پوځي ادارو ته اجازه ورکړه چې له نظامي لارې په پاکستان کې د ترهګریزو سازمانونو اهداف پر نښه کړي.
دغه پرېکړه داسې مهال کېږي چې د پاکستان دفاع وزیر خواجه اصف د اپرېل په وروستۍ اوونۍ کې له سکای نیوز ټلویزیوني رسنۍ سره په مرکه کې ومنله چې هېواد یې شاوخوا درېیو لسیزو راهیسې د امریکا، لوېدیځ او بریټانیا لپاره له ترهګرۍ ملاتړ او روزنه کړې.
