د بلخ اوسېدونکي: له اسلامي امارته غواړو د لرغونو ځایونو او اثارو ساتنې ته پام وکړي 

 د بلخ ولایت اوسېدونکي وايي، په دې ولایت کې لرغوني ځایونه او اثار د وېجاړېدو له ګواښ سره مخ دي او له اسلامي امارته غواړي، چې دې برخې ته پام وکړي.

د بلخ اوسېدونکی مجنون وايي:« په تېر حکومت کې د بلخ يو شمېر تاريخي اثار ورغول شول؛ خو اوس يې بيا ډېر ځايونه فرسوده شوي او د ويجاړېدو له ګواښ سره مخ شوي، له اوسني حکومته غواړو چې دې برخې ته ډېره پاملرنه وکړي.»

د بلخ یو بل اوسېدونکی مولو الدين وايي:« له نېکه مرغه اوس امنيت ښه دی، نو له اسلامي امارته غواړو، چې د بلخ هغو لرغونو اثارو رغونې ته دې جدي پام وکړي، چې د نابودۍ له ګواښ سره مخ دي.»

په ورته مهال مزارشريف کې لرغون پوهان وايي، حکومت بايد د تاريخي اثارو او لرغونو شتمنيو ساتنې ته جدي پاملرنه وکړي، ترڅو په دې ډول د افغانانو فرهنګ او هويت خوندي پاتې شي. 

لرغون پوه صالح محمد خليق وايي:« د يوه ملت د فرهنګي او تاريخي هويت د ژوندي ساتلو لپاره د لرغونو اثارو او تاريخي آبدو ساتنه اړینه ده. د نړۍ ټول هېوادونو دې برخې ته پاملرنه کوي او موږ هم بايد ورته پام وکړو.»

اخوا د  بلخ د اطلاعاتو او فرهنګ رياست مشر ذبیح الله  نوراني بیا  وايي، له اغاخان بنسټ او يونیسکو سره یې پر ګډه هڅې پيل کړي، ترڅو هغه لرغوني اثار خوندي کړي، چې دمګړی د نابودۍ تر ګواښ لاندې دي. 

نوراني زیاته کړه:« کوم لرغوني اثار او ځايونه، چې د نابودۍ له ګواښ سره مخ دي، په ډېر لنډ  وخت کې به له اغا خان بنسټ او يونسکو سره پر ګډه د هغو د بيارغونې او خوندي کولو لپاره کار شروع کړو.»

نوراني  له عامو خلکو هم غواړي، چې د بلخ په لرې پرتو سيمو کې دې د لرغونو اثارو او تاريخي ځايونو ساتنې ته په مسوولانه ډول  پام  وکړي. 

بلخ کې د لرغونو ځايونو په درلودو سره، چې عمر يې له درېیوو تر پنځه زره کلونو رسېږي، د افغانستان مهم او تاريخي ولايت ګڼل کېږي.