امریکا له ایران سره د اټومي پروګرام په اړه د مخامخ خبرو له پیلولو خبر ورکړی.
د دې هېواد ولسمشر ډونالډ ټرمپ د دوشنبې په ورځ په واشنګټن کې د اسراییلو له لومړي وزیر بینیامین نتنیاهو سره په لیدنه کې ویلي، د ایران اټومي وسلو په اړه به شنبه د واشنګټن او تهران لوړ پوړي چارواکي مهمه ناسته ولري.
ټرمپ همداراز خبرداری کړی،که د ډېپلوماسۍ له لارې یې له ايران سره د اټومي پروګرام په اړه خبرې ناکامې شي، دا به تهران ته ناوړه پایلې ولري.
ټرمپ زیاته کړې:« موږ یوه مهمه لېدنه لرو. موږ ګورو چې څه پېښېږي؟ زه فکر کوم هرڅوک د هوکړې رامنځته کېدو ته خوشالېږي، خو که ډېپلوماټيکې هڅې د اټومي وسلو د محدودیت په برخه کې ناکامې شي، نو تهران به اټومي وسلې ونه شي لرلی.»
تهران له دې وړاندې له واشنګټن سره مستقیم مذاکرات رد کړي او غیر مستقیم مذاکرات یې د ډېپلوماسۍ دوام لپاره پرانیستې لار بللې ده.
خو تازه د ایران د بهرنیو چارو وزیر عباس عراقچي پر خپله اېکس پاڼه لیکلي، له امریکايي چارواکو سره غیر مستقیم مذاکرات به د عمان په کوربتوب راتلونکې شنبه پیل کړي.
عراقچي زیاته کړې:« ایران او د امریکا متحده ایالاتو پلاوي به د شنبې په ورځ په عمان کې د لوړې کچې غیر مستقیمو مذاکراتو لپاره سره وویني. دا یوه موقع او ازموینه ده او اوس توپ د امریکا په میدان کې دی.»
ټرمپ له دې وړاندې له اېم.بي.سي ټلوېزيون سره په مرکه کې تهران ته ګواښ کړی و، که له واشنګټن سره مستقیم مذاکرات ونه مني او اټومي پروګرام محدود نه کړي، پر دې هېواد به هوايي بریدونه وکړي.
خو د سیاسي چارو کارپوهان د ایران او امریکا ترمنځ د مذاکراتو متناقض تعریف ته په اشارې وايي، واشنګټن پر تهران له پوځي لارو فشار زياتولو ته لېوالتیا نه لري او اوسني ګواښونه يوازې د تهران وېرولو لپاره دي.
د دوی په خبره، ټرمپ په تېره واکمنۍ کې هم پر ایران پراخ اقتصادي بنديزونه وضع کړل، خو له پوځي لارې یې هېڅ اقدام ته زړه ښه نه کړ.
د سیاسي چارو شنونکی عزیز معارج وايي: « دواړه هېوادونه پوهېږي چې جګړه د دوی پر ګټه نه ده، نه یوازې ایران بلکې امریکا هم نه غواړي جګړه وکړي؛ ځکه چې په دې کې یې تاوان دی. که څه هم دواړه په دې پوهېږي، خو بیا هم یوبل ته ګواښونه کوي. په پای کې ښايي د روسیې یا کوم بل هېواد په منځنګړیتوب دواړه هېوادونه خبرو ته سره کېني.»
امریکا په ۲۰۱۸ زېږدیز کال د ولسمشر ډونالډ ټرمپ د لومړۍ واکمنۍ پر مهال د برجام په نوم له هغه تړون په ناڅاپي توګه د وتلو پرېکړه وکړه چې په ۲۰۱۵ زېږدیز کال د امریکا، جرمني، فرانسې، بریتانیا، چین او روسیې له لوري د تهران اټومي پروګرام د محدولو لپاره پرې هوکړه شوې وه.
هغه مهال ټرمپ په دې ټینګار درلود چې د ایران پر اټومي پروګرام وضع شوی محدودیت اوږد مهاله ګټه نه لري، د تهران د بالیستک توغندیو کنټرول نه تضمینوي او په جدي توګه سیمه يیز ثبات ننګوي.
