درې ورځې وړاندې د بلوچستان په مرکز کویټه کې د پاکستاني ځواکونو هغه مهال د بلوڅو د يووالي کمېټې مشره ماهرنګ بلوڅ او د ښځو په ګډون ګڼ شمېر نور معترضان ونیول چې د پاکستان د زور زیاتي پر وړاندې یې سوله ییز لاریون کاوه.
د بښنې نړیوال سازمان د ماهرنګ بلوڅ نیول کېدل غندلي او زیاته کړې يې ده چې باید ژر تر ژره خوشې شي.
دې سازمان ویلي، دغه نیونه غیرقانوني ده او د پاکستان حکومت باید ژر ترژره ماه رنګ بلوڅ او هغه ټول کسان خوشې کړي چې د سوله ییزلاریون د حق کارولو له امله نیول شوي دي.
یاد سازمان زیاته کړې:« پاکستان باید سم لاسي ماهرنګ بلوڅ او هغه نور کسان خوشې کړي چې د سوله ییز لاریون د حق کارولو له امله نیول شوي. له دې غیرقانوني نیونو نږدې ۳۸ ساعته اوړي، خو لاهم له خپلې کورنۍ او وکیل سره د لیدو اجازه نه لري. پاکستاني چارواکي باید د بلوڅو فعلانو د غیر قانوني توقیف زیاتولو لپاره بې ځایه قضیو ته د پای ټکی کېږدي.»
د سیاسي چارو کارپوهان وايي، پاکستان هڅه کوي د بلوڅو حق غوښتونکوغږ په جبر او زور کارولو سره خاموش کړي، خو دغه کار د بشري حقونو ضد اقدام دی.
د دوی په خبره، که پاکستان له دې ډول کړنو لاس پر سر نه شي، په دې هېواد کې به لاپسې امنیتي او سیاسي وضعیت پېچلی شي.
د پوهنتون استاد فیض محمد ځلاند وايي: « په دې وروستیو کې بلوڅ ملت پالي ګوندونه او د دوی مېرمنې او دغه راز بلوڅ کړېدلی ولس په کوټه کې راټول شوي، ترڅو وکولی شي د خپلو ورکو عزیزانو، ورڼو او خویندو پوښتنه وکړي، خو موږ وینو چې د دوی دغه غږ هم د ټوپک په شپېلۍ، په جبر، وحشت او دهشت د خاموشه کولو کوښښ کېږي. که پاکستان د بشري حقونو د ملاتړ په برخه کې خپله پالیسي بدله نه کړي او د بشر حقونو احترام ونه کړي، ماته ښکاري چې دا به د پاکستان لپاره په کوردننه سیاسي، اقتصادي او امنیتي ستونزې لا زیاتې کړي.»
ځینې نور بیا وايي، پاکستان باید د بشري حقونو ضد کړنې پرېږدي او د خلکو هغه حقونه ورکړي چې په سوله ییزه توګه یې غواړي.
د دوی باور که د ولس د سوله ییزو حرکتونو پر وړاندې حکومتونه له تشدد کار واخلي، پایله به منفي وي او د ستونزو د لا زیاتېدو سبب کېږي.
د سیاسي چارو شنونکی معین ګل څمکنی وايي:« هیله ده د پاکستان حکومت هغه حقونه ورکړي چې خلک یې په سوله ییز ډول غواړي، ځکه دا د ټولنې یو اصل دی. که چېرې په دې اړه له تشدد کار اخیستل کېږي، نو ولس هم په نظریاتي لحاظ زیانمن کېږي، قهرېږي او کله چې د قهر لاره ونیسي، بیا د دې تفکیک نه شي کولی چې ښه کوي که بد.»
د بلوڅانو د همغږۍ کمېټې مشره ډاکټره ماهرنګ بلوڅ درې ورځې وړاندې د پاکستاني پولیسو له لوري د ښځو په ګډون له یوشمیر نورو اعتراض کوونکو سره یوځای ونیول شوه او لا تراوسه د حکومت په قید کې ده.
د ماهرنګ بلوڅ نیولو ته ګڼو نړیوالو سازمانو غبرګون ښودلی او د پاکستان دغه کار یې غندلی دی.
