د بلوچستان په بولان دره کې د بلوڅو د آزادي غوښتونکو غورځنګ پر وړاندې د پاکستاني ځواکونو عمليات لاهم نه دي بشپړ شوي.
دې غورځنګ له کوېټې ښار۱۵۷ کيلومټره لرې د بولان درې اړوند مشخاف تونل کې د جعفر اېکسپرېس يو مسافر وړونکی اورګاډی برمته کړی چې۴۵۰ تنه په کې سپاره و.
بلوڅ آزادي غوښتونکي ادعا کوي چې په برمته کړو کسانو کې د پاکستان د پوځ، استخباراتو او نورو امنيتي ادارو لسګونه غړي شامل دي.
که څه هم دې غورځنګ د ځينو عامو وګړو د خوشې کولو خبر ورکړی، خو پاکستاني ځواکونو بيا د ټولو برمته شویو د خوشې کولو په موخه په سيمه کې د ځمکې او هوا له لارې عمليات پيل کړې دي. بلوڅ آزادي غوښتونکي غورځنګ خبرداری ورکړی که پاکستاني ځواکونه يې پر وړاندې له سختۍ کار واخلي، برمته کړي به اعدام کړي.
د بلوڅ آزادي غوښتونکي غورځنګ اعلامیې یوه برخه:« که د اشغالګرو ځواکونه د پوځي عملیاتو هڅه وکړي، پایلې به یې سختې وي. ټول برمته کسان به اعدام شي او پړه به یې د اشغالګرو ځواکونو پر غاړه وي.»
په ورته مهال په خواله رسنيو کې بلوڅ آزادي غوښتونکو ته منسوبو آدرسونو ويلي، د برمته کسانو د خوشې کولو لپاره د پوځ او بلوڅ آزادي غوښتونکو ترمنځ نښتو کې له ۳۰ زیات پاکستاني پوځيان وژل شوي او يو شمېر نور ټپیان دي.
خو د پاکستان دولتي راډیو بيا د امنیتي سرچینو له قوله راپور ورکړی چې له بلوڅ وسلوالو يې د ۱۵۵برمته کسانو د خوشې کولو پر مهال ۲۷ بلوڅ وسله وال وژلي دي.
په پاکستان کې دېره آزاد خبریال طاهر خان وايي: « د بلوچانو د آزادۍ غورځنګ د دې برمته نیونې مسوولیت اخیستی او حکومت ته یې ۴۸ ساعته وخت ورکړی چې د یرغمل شویو کسانو په بدل کې هغه کسان له زندانونو آزاد شي چې د پاکستان حکومت نیولي. تر اوسه د پاکستان حکومت او پوځ په دې اړه څه نه دي ویلي.»
په دې وروستیو کې د پاکستان په مهمو ښارونو اسلام اباد، لاهور او کراچۍ کې چې ګڼ ډېپلوماتیک مرکزونه په کې موجود دي، د بلوڅ آزادي غوښتونکو له لوري هدف ګرځول شوي.
د ۲۰۲۳ کال د اپرېل پر ۲۶ مه کراچۍ کې پر چینايي وګړو برید چې په کې دوه چينايان ووژل شول، د یادې ډلې یو له سترو بریدونو شمېرل شوی.
د سیاسي چارو شنونکی عزیز معارج وايي: « په پاکستان کې د کورني وضعیت د خرابېدو دوه ستر لاملونه دي. یو، د نورو ملتونو لکه سندیانو، پښتنو او بلوڅانو پر وړاندې د پنجابي ریاست غلط او ظالمانه سیاستونه او پالیسۍ دي چې له امله یې دغه ملتونه تر پوزې راغلي او له دغه ظلم د ځان او قوم ژغورلو لپاره راپورته شوي دي. دویم، لوېدیځ له دې وړاندې د پاکستان ډېر زیات ملاتړ کاوه، خو کله چې دوی له چین سره اړیکې جوړې کړې، ګوادر بندر یې وروسپاره او قراردادونه یې لاسلیک کړل، نو لوېدیځ ورته په غوسه شو.»
په ورته مهال، یو شمېر نړیوالو رسنیو راپور ورکړی چې د بلوڅ آزادي غوښتونکو او پاکستاني پوځیانو ترمنځ د برمته کسانو د آزادېدو پرمهال نښتو کې ۸ پاکستاني پوځيان وژل شوي او یو شمېر نور ټپیان دي.
د پاکستان پوځ تر اوسه دغه شمېرې نه رد او نه هم تایيد کړې دي.
