د روشن مخابراتي شرکت له خوا د الفا پرایم په نوم د نوي وړاندیز له لارې د پیرېدونکو لپاره د عمرې حج پچه اچونه وشوه.
د دې وړاندیز له مخې، یاد شرکت په اوونۍ کې ۵ تنه او میاشت کې ۲۰ تنه خپل پېرودونکي د پچه اچونې له لارې د عمرې حج اداء کولوته استوي.
د روشن مخابراتي شرکت مسوولان د خپلو وړانديزونو د پراخولو ترڅنګ وايي، د اترا له ادارې سره پر ګډه هڅه کوي چې له مخابراتي خدمتونو محرومې سيمې هم تر پوښښ لاندې راولي.
د روشن مخابراتي شرکت د محصولاتو متخصص مسیح الله عزت یار وايي:« روشن مخابراتي شرکت ژمن دی چې د روژې مبارکې میاشتې په هره اوونۍ کې پنځه تنه د عمرې حج ته استوي او یا یې معادل لګښت چې ۱۰۰ زره افغانۍ کېږي، خپلو پېرودونکو ته ډالۍ کوي. په یوه میاشت کې به زموږ د الفا پرایم وړاندیز ۲۰ تنه پېرودونکي د عمرې حج پکېج ترلاسه کړي.»
له دې سره، د اترا ادارې مسوولان وايي، په تېرو درېیو کلونو کې شاوخوا ۱۸میلیونه سیمکارټونه راجسټر شوي او دا لړۍ لاهم روانه ده.
د دوی په خبره، په نوي کال کې به د مخابراتي خدمتونو د پراخولو په موخه شاوخوا۵۵۰ نوي مخابراتي سايټونه فعال شي او په دې توګه به هغه سيمې تر مخابراتي پوښښ لاندې راشي چې له دې وړاندې په کې دغه خدمتونه نه وړاندې کېدل.
د اترا ادارې ویاند جلال شمس وايي:« اترا ادارې د خپلې انکشافي بودیجې له لارې ۵۵۰ مخابراتي آنتنونه اعلان ته ورکړي وو چې د جوړېدو په حال کې دي او په ډېرو سیمو کې یې د جوړېدو چارې بشپړې شوې هم دي. د دغو آنتنونو په جوړېدو سره به د هېواد ټولې لرې پرتې سیمې تر مخابراتي پوښښ لاندې راشي. همدارنګه په لویو لارو او ټرانزیټي مسیرونو کې هم د مخابراتي خدمتونو د نه شتوالي ستونزه وه، خو ټولو مخابراتي شرکتونو په ښه توګه کار وکړ او د نویو آنتنونو د جوړولو چارې یې پیل کړې. د مثال په توګه، اوس د کابل جلال اباد لاره تر تورخم پورې تر مخابراتي او انټرنېټي پوښښ لاندې نیول شوې ده، حتا ماهیپر کې هم تري جي انټرنېټ لرو.»
دا په داسې حال کې ده چې له دې وړاندې هم اترا ادارې د مخابراتي شرکتونو په همکارۍ په يو شمېر سیمو کې نوي مخابراتي سايټونه فعال کړي چې ډېری هغه يې د لويو لارو په اوږدو کې فعال شوي دي.
