امریکا په نړۍ کې د لویو کړکېچونو او جګړو د رامنځته کېدو او مخنیوي لپاره تګ لارې جوړوي، خو اوس مهال یې د حکومتولۍ په چارو کې د کورنیو مسایلو پر سر د اختلافونو لمن تر لفظي شخړو رسېدلې ده.
نیویارک ټايمز ورځپاڼې په سپینه ماڼۍ کې د ولسمشر ډونالډ ټرمپ پر مشرۍ د کابینې په ناسته کې د بهرنیو چارو وزیر مارکو روبیو او د اغېزناکې حکومتولۍ ادارې د رییس اېلان ماسک ترمنځ د لفظي شخړې جزئیات خپاره کړي دي.
د نیویارک ټایمز په راپور کې راغلي، د اېلان ماسک او مارکو روبیو ترمنځ د شخړې اصلي لامل په بهرنیو چارو وزارت کې د هغو سلګونو تنو د انفکاک نامعلوم برخلیک په اړه و چې د دې هېواد فډرالي ادارې سره یې کار کاوه.
د نړۍ لوی شتمن اېلان ماسک د تمسخر په ژبه روبیو تورن کړی چې د موثریت ادارې له یوه کارکوونکي پرته یې بل هېڅوک له دندې نه دي ګوښه کړي.
د امریکا د اغېزناکې حکومتوالۍ ادارې رییس اېلان ماسک ویلي: « تا هېڅوک له دندو نه دي لرې کړي. شاید یو څوک چې تا له دندې لرې کړی وي، زما د موثریت ادارې یو کارکوونکی به وي.»
راپور زیاتوي، سمدستي د امریکا بهرنیو چارو وزیر مارکو روبیو چې له څو اوونیو راهیسې اېلان ماسک ته د ځينو مسايلو له امله غوسه و، د فډرالي ادارې د سلګونه کارکوونکو په جبري توګه منفکول د خپلو فعالیتونو مهم اقدام وباله.
د امریکا د بهرنیو چارو وزیر مارکو روبیو ویلي: « دا ناسم مالومات دي. آیا په بهرنیو چارو وزارت کې د څه باندې۱۵۰۰ کسانو تقاعد ته اړ ایستل د کارکوونکو کمېدو په مانا نه دي؟ آیا اېلان ماسک غواړي دغه کسان له سره بیا تقاعد شي؟»
د نیویارک ټایمز د راپور له مخې، ډونالډ ټرمپ د اېلان ماسک او روبیو ترمنځ د اوږدې شخړې پر مهال تر ډېره غلی پاتې شو، خو وروسته یې د کابینې په ناستو کې د ګډوډیو مخنیوي لپاره امر وکړ چې وزیران به اجراییوي او اېلان ماسک به مشورتي صلاحیتونه لري.
ټرمپ پرخپله اېکس پاڼه د امریکا د فډرالي ادارې د کارکوونکو کمولو ته په اشارې ویلي، د کارکوونکو کمولو په اړه به یې دریځ نور هم سخت شي.
ټرمپ زیاته کړې:« د فډرالي ادارې کارکوونکو کمولو بل پړاوو ته به مې طرحه د تبر پر ځای د عملیات چاقو ګټه اخیستل وي.»
نیویارک ټایمز وړاندې لیکلي، د امریکا په حکومت کې د چارواکو ترمنځ د اختلافاتو نوې څپه به د حکومتولۍ پر چارو منفي اغېز وکړي او د دې کار بېلګې به په راتلونکي کې څرګندې شي.
بله خوا، د امریکا د نړيوالې پراختیايي ادارې زرګونه کارکوونکي د ډونالډ ټرمپ له بیا واکمنېدو سره له دندو ګوښه او له نامالوم برخلیک سره مخ شول.
