د پاکستاني طالبانو تحریک (ټي.ټي.پي) د پاکستان د وسله وال پوځ پر وړاندې د خپلې مبارزې په تړاو د تېرې یوې میاشتې د بریدونو جزئیات خپاره کړي.
په دې اړه خپره شوې اعلامیه کې راغلي، ټي.ټي.پي یوازې په فېبرورۍ میاشت کې د پاکستان پر پوځیانو، پولیسو او استخباراتي کارکوونکو ۱۴۷ هدفي او تعرضي بریدونو کړي چې په کې ۱۸۰ تنو ته مرګ ژوبله اوښتې.
د اعلامیې له مخې، ډېری بریدونه د خیبرپښتونخوا په شمالي او جنوبي وزیرستان، خیبر، ټانک او دېره اسماعیل خان کې شوې چې د مرګ ژوبلې اړولو ترڅنګ، یو شمېر پاکستان پوځیان ژوندي هم د دوی لاس ته ورغلي دي.
د اعلامیې یوه برخه: « تېره میاشت ۵۳ چریکي بریدونه، ۵۰ لایزري بریدونه، ۱۱ کمینونه، ۹ ځوابي بریدونه، ۱ هدفي برید، ۱۴ لاسي بمونه او ماینونه او ۹ تعرضي بریدونه شوې دي.»
په اعلامیه کې دغه راز راغلي، په دې بریدونو کې نږدې ۲۰۰پوځي ادارو ته زیانونه اړول شوې او یو شمېر سپکې او درنې وسلې هم د ټي.ټي.پي لاسته لوېدلې دي.
اعلامیه زیاتوي، د پوځ اړوند ګڼ تأسیسات، پوځي تجهیزات او وسایط هم ویجاړ شوې دي.
د اعلامیې یوه برخه: « د تېرې میاشتې په بریدونو کې د پوځ او اېس.اېس.جي ۹۷ ادارې، د اېف.سي ځواکونو ۴۴ ادارې، د پولیسو او سي.ټي.ډي ۳۸ ودانۍ، د استخباراتو او امن کمېټې ۱ مرکز ویجاړ او زیانمن شوې دي.»
د سیاسي چارو شنونکي د پاکستان پر پوځي اهدافو د ټي.ټي.پي د بریدونو شدت او پراخې لاسته راوړنې د دې تحریک د پیاوړي کېدو په مانا بولي.
د دوی په باور، د ټي.ټي.پي په کنټرولولو کې د پاکستان حکومت پاتې راتللو له کبله، دغه تحریک کولی شي په راتلونکي کې د پاکستان پوځ ته لوی سرخوږی جوړ کړي.
د سیاسي چارو شنونکی خلیل احمد نادم وايي: « د پاکستان حکومت به هغه څه خامخا رېبي چې کرلي یې دي. نن نه یوازې ټي.ټي.پي په پاکستان کې فعالیت لري، جګړې کوي، لاسته راوړنې لري، د دې هېواد پوځیان وژني او وسلې تر اخلي، بلکې بلوڅ مبارزین هم راپورته شوي او سندیان او کشمیریان به هم راپورته شي.»
د سیاسي چار شنونکی معین ګل څمکنی وايي: « دا ډېره لویه شمېره ده او امکان لري چې په نږدې راتلونکي کې تر دې هم پورته شي. د پاکستان حکومت دا مهال له سختو ستونزو سره لاس په ګرېوان دی چې په کې سیاسي، اقتصادي، نظامي او ټولنیزې ستونزې شاملې دي.»
ټي.ټي .پي داسې مهال دغه مالومات خپروي چې یاد تحریک له دې وړاندې هم د پاکستان پر پوځي اهدافو د خپلو وسله والو بریدونو په جزئیاتو کې د دې هېواد ګڼو پوځیانو ته د مرګ ژوبلې اړولو ادعاوې کړې او وايي، د دوی په بریدونو کې موټر بم چاودنې او مخامخ وسله والې جګړې شاملې وې.
