د خیبر پښتونخوا د اکوړه خټک حقانیه دارالعلوم جومات کې د جمعې لمانځه پرمهال ځانمرګی بريد شوی چې په کې د پاکستان د مشهور عالم او د دې مدرسې د بنسټکر مولانا سميع الحق زوی مولانا حامد الحق هم ژوند له لاسه ورکړی دی.
د پاکستاني رسنيو په راپورنو کې راغلي، د دغه بريد په پايله کې پنځه تنه نورو کسانو ژوند له لاسه ورکړی او له ۲۰ زيات ژوبل شوې دي چې له ډلې یې د ځينو روغتيايي حالت نازک ښودل شوی.
په ټولنیزو رسنيو کې خپره شويو ويډوګانې کې ښکاري چې ځايي خلک د جمعیت علمای اسلام سمیع الحق ډلې مشر مولانا حامد الحق د بريد له ويجاړيو را وباسي.
د خیبر پښتونخوا د نوښار نوشهره سیمې اکوړه خټک حقانیه دارالعلوم کې له ځانمرګي بريد وروسته د سيمې خلک په ډله ییز ډول راغونډ شوي او د دې بريد غندنه کوي.
د سيمې مشران ځايي خلکو ته په وينا کې وايي، په پاکستان کې امنيتي وضعيت خراب دی او له ډله ییزو راټولېدنو دې ډډه وشي.
د نوښار نوشهره سيمې اوسېدونکی وايي: « دلته یې په هغوی باندې چاودنه وکړه، مشرانو تاسو را یوځای کېږئ مه، حالات خراب دي ځانونه پوه کړئ. بیا بیا درته وایم چې دننه مه ورځئ هلته څه نه شته.»
بله خوا، له دې بريد وروسته د سيمې په روغتيايي مرکزونو کې بېړنی حالت اعلان شوی. که څه هم د دې ځانمرګي بريد مسووليت تراوسه کومې ډلې پر غاړه نه دی اخیستی، خو د سیاسي چارو شنونکي دا ډول کړنې د سيمې د اسختباراتي کړيو پلان شوي اهداف بولي.
د سیاسي چارو شنونکی شهسوار سنګروال وايي: « که څه هم تر دې دمه د برید پړه چا نه ده منلې، خو امکان لري چې په دې کې د استخباراتو لاس وي؛ ځکه چې استخبارات غواړي له دې ډول مرګونو استفاده وکړي یا د دغو وژنو پړه پر یوه بل هېواد واچوي.»
د سياسي چارو شنونکی واحد فقیري وايي: « د دې برید له تازه حال او مالوماتو داسې ښکاري چې د پاکستان مذهبي ډلې د یو د بل په خلاف راپورته شوې دي، د دوی ترمنځ اختلافونه ډېر شوي او داسې حد ته رسېدلي چې د یو بل له منځه وړلو ته یې مخه کړې.»
له دې ځانمرګي بريد سره هم مهاله، د بلوچستان په کوېټه کې ښار کې هم د پاکستاني پوځ پر موټر چاودنه شوې چې په پايله کې یې څلور تنه پوځيان وژل شوې او اته نور ژوبل شوي دي.
د يادونې ده چې۵۷ کلن حامد الحق د حقاني دارلعلوم مرستیال مشر و او په ۲۰۱۸ کال کې یې د خپل پلار مولانا سمیع الحق ژوند له لاسه ورکولو وروسته د جمعیت علمای اسلام سميع الحق ډلې مشري پر غاړه واخیسته. نوموړی له ۲۰۰۲ تر ۲۰۰۷ زېږدیز کال پورې د پاکستان قامي اسمبلۍ یا ولسي جرګې غړی هم پاتې شوی و.
