د زابل ولایت سیوري ولسوالۍ ممو کلي خړه صحرا کې له پامه وتلی یو مزار د پښتو لرغوني ادب د نومیالي لیکوال محمد بن داوود هوتک دی چې د هوتکیانو دورې د دربار لیکوال او محرر پاتی شوی او د خپل ژوند په اوږدو کې یې د پښتو ادب تاریخي کتاب «پټه خزانه» هم تالیف کړی.
د زابل د اطلاعاتو او فرهنګ ریاست مسوولین وایي، له پېړیو راهیسې د محمد هوتک مزار له پامه غورځېدلی او هېڅ ډول پاملرنه نه ده ورته شوې.
ځايي مسوولین تازه خبر ورکوي چې د دې مزار د ساتنې لپاره اوس استنادي دېوال جوړوي او ورپسې به یې د ساتنې نورې هڅې هم وشي.
د زابل ولایت د اطلاعاتو او فرهنګ رییس مولوي رحمت الله حماد وايي: « بدبختانه څو پېړۍ تېريږي مګر د ده پر قبر او مقبره هېڅ ډول کار نه دی شوی. د وخت په تېرېدو سره د دې هدیرې ډېر قبرونه له منځه تللي. موږ خپل نهایت کوښښ کوو چې د ده قبر وژغورو. اوس د ده له مزار دېوال چاپېروو او د مرکز له لارې به هڅه وکړو چې د رغونې لپاره یې لارې پیدا کړو.»
د سیوري ولسوالۍ د ممو کلي اوسېدونکي د مسوولینو له دې تازه هڅو خوښ دي او له سرپرست حکومته غواړي چې د محمد هوتک مزار د نورو برخو جوړولو لپاره دې هم هڅې وکړي.
د ممو سیمې اوسېدونکی مولوي عبدالاحد وايي:« ده پښتو ژبې ته ډېر زیات خدمت کړی، نوموړي د مکاتبو د تحریر او تاریخ لپاره هم کتابونه لیکلي وو.»
د سیمې یوبل اوسېدونکی حاجی لعل محمد وايي: « دا قبر خوړ ته نږدې دی او باید د سېلابونو په وسیله د ویجاړېدلو مخه یې ونیول شي.»
د ممو سیمې یو بل اوسېدونکی محمد قاسم وايي: « غوښتنه کوو چې دا زموږ د نیکه مزار راجوړ کړي، موږ هر ډول همکاریو ته تیار یو.»
زابل کې مېشت لیکوالان وايي، محمد هوتک د پښتو ژبې لپاره نه هېریدونکی تاریخي خدمت کړی چې راتلونکی نسل به یې دا یاداښتونه یاد ساتي.
لیکوالو او ادیب سردارولي سرحدي وايي: « په نړۍ کې بریالي ملتونه، بریالي قومونه او بریالي هېوادونه هغه دي چې خپل تېر تاریخ ته په کتو د راتلونکي په اړه فیصله کوي. تاریخي روایتونه دا وايي چې د هر قوم او ملت تېر ته په کتو د راتلونکي پرېکړه کېږي. محمد هوتک او ورسره نور لیکوالان زموږ تېر تاریخ او هغه څوک دی چې زموږ هویت یې راپېژندلی. موږ د اطلاعاتو او فرهنګ ریاست د هغه ګام ستاینه کوو چې د نوموړي د مزار روغولو لپاره یې پورته کړی.»
محمد هوتک په ۱۰۸۴ هجري کال د کندهار ارغنداب ولسوالۍ کوکران سیمه کې نړۍ ته سترګې غړولې دي.
له دیني او فقهي زده کړو ورسته یې شاهي دربار کې د لیکوالۍ خدمت پیل کړی او په ۱۱۵۰ هجري قمري کال یې خپل نامتو اثر «پټه خزانه» ولیکله.
محمد هوتک د ۱۱۶۰ او ۱۱۶۲ هجري کالو ترمنځ وفات شوی.
