دوې ورځې وړاندې هندي رسنیو راپور ورکړ چې په پاکستان کې د کرېکټ اتلانو جام )چمپینز ټرافي( سیالیو پرمهال بهرنیو وګړو ته جدي امنیتي ګواښونه موجود دي.
په راپورونو کې راغلي، د پاکستان استخباراتي ادارې دوشنبه(د فېبرورۍ ۲۴ مه) د داعش خراسان څانګې له لوري د احتمالي امنیتي ګواښونو خبر ورکړی او موندلې یې ده چې داعش غواړي د بهرنیو اتباعو د تښتولو هڅه وکړي.
د پاکستان په کوربه توګه د اتلانو جام سیالیو نندارې ته د نړۍ له بېلابېلو هېوادونوسیل کوونکي ورغلي دي.
انډیا ټوډ مجلې په دې اړه لیکلي: « د پاکستان استخباراتو ادارې خبرداری ورکړی چې د داعش خراسان څانګه پلان لري، ترڅو د اتلانو جام سیالیو پر مهال بهرني وګړي په ځانګړي ډول د عربي هېوادونو اتباع او چینایان وتښتوي.»
په ورته مهال، سي اېن اېن -۱۸ رسنۍ هم راپور ورکړی چې په پاکستان کې د کرېکټ اتلانو جام سیالیو له پیل وروسته، تېره ورځ د پاکستان استخباراتي ادارې (آی.اېس.آی) د داعش خراسان څانګې، بلوڅ آزادي غوښتونکو او تحریک طالبان پاکستان له لوري د امنیتي ګواښ خبرداری ورکړی دی.
خو په ورته مهال، د پاکستان حکومت د هندي رسنیو دغه ادعا او راپورونه رد کړي او ټینګار یې کړی چې پاکستان کې د اتلانو جام سیالیو لپاره هېڅ امنیتي ګواښ نه شته.
د پاکستان د اطلاعاتو وزیر له یوې خصوصي رسنۍ سره په مرکه کې پاکستان ته د هند کرېکټ ملي ټیم د نه ورتګ او په دوبۍ کې له هند سره د ګروپي لوبو ترسره کولو او دغه راز په پاکستان کې د امنیتي ګواښونو په اړه د هندي رسنیو راپورونو ته په اشارې ویلي، نوی ډهلی غواړي د پاکستان ثبات بد نام او د سیالیو د بریالي کوربتوب پر وړاندې منفي تبلیغات وکړي.
عطا الله تارړ ویلي، هند د کینې، نا پېرزوینې او له اوږدې مودې وروسته په پاکستان کې د نړیوالو لوبو کوربه توب له امله دا ډول پروپاګند ته مخه کړې.
هغه زیاته کړې: « پاکستان د نړۍ له امن لرونکو هېوادونو شمېرل کېږي او موږ د آی.سي.سي لوبو په پوره امن او مهارت سره کوربتوب کړی دی.»
تېره اوونۍ د پاکستان کرېکټ پخواني لوبغاړي انظمام الحق پنځلس کاله وړاندې د دې هېواد لاهور ښار په قزافي لوبغالي کې پرسریلانکايي کرېکټ لوبغاړو وسلوال برید ته په اشارې ویلي وو چې یاد برید پاکستان کرېکټ له پرمختګ شاته پرېښود او دې هېواد ته یې لوی زیان ورساوه.
هغه زیاته کړې: « د ۲۰۰۹کال پېښه یو بد خوب ته ورته ده، موږ ته یې له لسو کالو راهیسې سخته سزا راکړه او پاکستان کرېکټ ټیم یې له پرمختګ شاته وغورځاوه.»
د راپورونو له مخې، په ۲۰۰۹ زېږدیز کال د مارچ پر درېیمه د پاکستان لاهور ښار قزافي کرېکټ لوبغاړي ته څېرمه د ۱۲ ناپېژاندو وسلوالو له لوري د سریلانکا پر کرېکټ ټیم برید وشو چې د شپږ پولیسو او دوو عامو کسانو د وژلو په ګډون یې ۶ سریلانکايي لوبغاړي او یو د کرېکټ څارونکی یا امپایر ټپی کړل.
همدارنګه اسوشتېد پرېس آژانس راپور ورکړ چې په پاکستان کې له دې پېښې شاوخوا ۱۲ کاله وروسته د ۲۰۲۱ زېږدیز کال سپټمبرمیاشت کې د پنجاب ایالت راولپنډۍ کرېکټ لوبغاړي ته څېرمه رسټورانټ کې چې د نیوزلند کرېکټ ټيم لوبغاړي په کې اوسېدل، د احتمالي ګواښونو له امله د پاکستان او نیوزیلنډ د کرېکټ لوبو لړۍ ودرول شوه.
