روسي ځواکونو له ځمکې او هوا د ۲۰۲۲ زېږدیز کال د فېبرورۍ میاشت کې پر اوکراین بریدونه پیل کړل.
سره له دې چې جګړه لاهم روانه ده، د اوکراین یو شمېر نږدې متحدین چې په تېرو درېیو کالو کې یې د دې هېواد پوځي همکاري کړې، د جګړې پای ته رسولو لپاره متفاوت لیدلوري لري.
د روس – اوکراین جګړې له درې کاله پوره کېدو سره سم، د کاناډا او د ناټو تړون یو شمېر غړیو اروپايي هېوادونو مشرانو اوکراین ته سفر کړی او په ورته مهال تېره ورځ د فرانسې ولسمشر اېمانوېل مکرون له خپل امریکايي سیال ډونالډ ټرمپ سره په واشنګټن کې په دې تړاو خبرې کړې.
د امریکا ولسمشر ډونالډ ټرمپ د فرانسې له ولسمشر اېمانوېل مکرون سره د اوکراین جګړې پای ته رسولو لپاره پر خپل دریځ ټینګار کړی او ویلي یې دي، مسکو په اوکراین کې د اروپا له سوله ساتو ځواکونو مېشتېدو سره مخالفت نه لري.
ولسمشر ټرمپ دغه راز د اوکراین طبیعي زېرمو د استخراج هوکړې ته رسېدو لپاره د دې هېواد ولسمشر ولادومیر زېلېنسکي واشنګټن ته ور بللی دی.
د امریکا ولسمشر په دې اړه وايي: « په اوکراین کې د روسیې جګړه نوره پای ته د رسېدو په حال کې ده او په څو اونیو کې به پای ته ورسېږي. پوتین به دا ومني چې په اوکراین کې د اروپا سوله ساتي ځواکونه مېشت شي. همدارنګه موږ له اوکراین سره د طبیعي منرالونو هوکړې ته ډېر نږدې شوي یو. زېلېنسکي به پر همدې موخه راتلونکي اوونۍ واشنګټن ته سفر وکړي.»
دا په داسې حال کې ده چې اروپايي هېوادونه له اوکراین د روسیې د احتمالي ګواښونو په اړه اندېښمن دي. د فرانسې ولسمشراېمانویل مکرون چې په اوکراین کې د تل پاتې او اغېزمنې سولې په تامینولو یې ټینګار کړی، وايي، په اوکراین کې د جګړې هر ډول پای ته رسول باید د سولې په مانا نه وي.
مکرون له ټرمپ غوښتي چې له بشپړې اروزنې او اروپايي متحدینو سره په مشوره دې د اوکراین جګړه پای ته ورسوي.
د فرانسې ولسمشر ویلي: « موږ هم سوله غواړو او مسکو هم سوله غواړي؛ خو موږ داسې هوکړه نه غواړو چې کمزورې وي. امریکا او اروپا ګډ متحدین دي او واشنګټن د دې حساسې موضوع پای ته رسولو لپاره مهم مسوولیت لري. »
د اوکراین ولسمشر څو ورځې وړاندې ویلي وو چې له روسیې سره په جګړه کې یې۳۱ زره ځواکونه وژل شوي، خو د وال سټرېټ ژورنال موندنې ښيي چې له روسې سره په جګړه کې د اوکراین تر ۸۰ زره ځواکونه وژل شوي او۴۰۰ زره نور ژوبل شوي دي.
مسکو د روسي ځواکونو د مرګ ژوبلې په اړه شمېرې نه دي خپرې کړي، خو د امریکا مطالعاتو انسټیټیوټ ویلي، په دې جګړه کې د روسیې شاوخوا۸۰ زره ځواکونه وژل شوي دي.
بله خوا ملګرو ملتونو د اوکراین جګړې د زیانونو په اړه په تازه راپور کې ویلي چې د روسیې له لوري د دې جګړې په پیل کېدو سره، څه باندې ۱۰ میلیون خلک بې ځای شوي او د میلیونونو نور کورونه ویجاړ شوي دي.
د ملګرو ملتونو په راپور کې راغلي: « د اوکراین په درې کلنه جګړه کې ۱۰.۶میلیون تنه بې ځایه شوي، د شاوخوا ۲ میلیونو تنو کورونه ویجاړ شوي او د اوکراین د ټول نفوس درېیمه برخه بشري مرستو ته اړ شوي دي.»
له بلې خوا، ټاکل شوې د اوکراین د برخلیک په اړه د بریټانیا لومړی وزیر کیېرسټارمر په راتلونکو څو ورځو کې واشنګټن ته سفر ولري.
راپورونه وايي، د دې سفرهدف له ټرمپ سره کتنه کې به ډېر تمرکز د اوکراین د جګړې پای ته رسولو پر څرنګوالي وي.
