د پاکستان جمعیت علماء اسلام ګوند مشر د دې هېواد ملي اسمبلۍ په یوې عمومي ناسته کې له افغانستان سره د پاکستان روان سیاستونه او پالیسۍ سختې ننګولې دي.
مولانا فضلالرحمن د دوشنبې پر ورځ(د سلواغې ۲۹ مه) د پاکستان ملي اسمبلۍ ۱۳ مې ناستې ته په خبرو کې ویلي، د پاکستان پوځ او ریاست په تېرو ۴۰ کلونو کې د افغانستان او خپلو ګاونډیو هېوادونو پر وړاندې نیابتي جګړې مخته وړې دي.
نوموړي د پاکستان پالیسۍ غلطې او ناکامې بللې دي او د دې هېواد حکومت يې تورن کړی چې پر يادو پالیسيو د غور پر ځای يې په یوه او بله پلمه د ګاونډیانو د ملامتولو هڅه کړې او په دې توګه یې خپل ولس تېر ایستی دی.
هغه زیاته کړې: « موږ له۴۰ کلونو راهیسې نیابتي جګړې کړې او په دې جګړو کې د پاکستان پوځ او ریاست برخه اخیستې ده. په کومو جګړو کې چې افغان وژل کېږي، موږ خو خپله کینه او غوسه پر هغوی سړوو؛ خو هېڅکله مو پر خپلو غلطو پالیسیو غور نه دی کړی او د دې پر ځای مو هڅه کړې چې ګاونډیان ګرم وګڼو او له دې لارې د خپل ولس پام بلې خوا ته واړوو، ترڅو زموږ پرغلطیو او ناکامیو پوه نه شي. دا باید ومنو چې دغه مسالې شته او په کې هېڅ راز تفصیل ته هم اړتیا نه لیدل کېږي. موږ هم باید خپلو ګرېوانو ته سر ټیټ کړو.»
مولانا فضلالرحمن دغه راز ویلي، د پاکستاني دیکتاتور جنرال پرویز مشرف پر مشرۍ د پاکستان حکومت پر افغانستان د امریکا د برید پرمهال خپله خاوره او فضا د غرب په واک ورکړه.
فضل الرحمن زیاته کړې، امریکا د دوی په واک کې د ورکړل شویو پوځي اډو او هوايي ډګرونو په وسیله د افغانستان پر خاوره او خلکو بمبارۍ کولې.
هغه په دې اړه ویلي: « دلته چې کله د پرویز مشرف حکومت و او هلته په امریکا کې ډیموکراتان په واک کې وو، نو ډېموکراتانو به ویل چې په پاکستان کې ديکتاتوري نظام حاکم دی. هغه مهال بل کلنټن هند ته تله، مګر په پاکستان کې پښه کېښودو ته هم چمتو نه و. زموږ له ډېرو هڅو او زاریو وروسته به چې راغی، نو ویل به یې چې نه غواړي د پاکستاني ديکتاتورانو سره انځور واخلي. خو له دې هرڅه سره، د سپټمبر له نهمې او یوولسمې پېښو وروسته، د پاکستان خاوره د هغوی په واک کې ورکړل شوه او وروسته موږ له ترهګرۍ سره د مبارزې په نوم د امریکا او ناټو متحدان شوو او هغوی ته مو خپلې هوايي اډې او فضايي حریم په واک کې ورکړل، وروسته به زموږ له اډو امریکايي جنګي الوتکې الوتې او هلته په افغانستان کې به یې بمبارۍ کولې.»
مولانا فضل الرحمن د پاکستان پر حکومت له دې کبله هم سخته نیوکې کړې چې کواګي افغانستان ته یې د تېر ۲۰۲۴زېږدیز کال په جنورۍ کې د سفر پایلې او پر مهمو مسایلو هوکړې چې د ده په خبره، د دواړو هېوادونو د اړیکو لپاره مهمې وې؛ د پاکستان د پالیسیو له امله، له پامه وغورځول شوې.
د سیاسي چارو شنونکي هم له افغانستان سره د پاکستاني حکومتونو دوه مخي سیاست ته په اشارې وايي، یاد هېواد د تاریخ په اوږدو کې تل له هېوادونو سره فرعي سیاست لوبولی او له دې لارو یې خپلو موخو ته د رسېدلو هڅه کړې.
د سیاسي چارو شنونکی شهسوار سنګروال وايي: « پاکستان له جوړېدو راهیسې افغانستان سره ښې اړیکې نه پالي او تل یې د افغانستان په کورنیو چارو کې لاسوهنه کړې. کله چې سردار محمد داوود خان واک ته ورسېد، بیا په بربنډه توګه د افغانستان خلاف جګړه اعلان کړه او تقریبا ً له هماغه وخت راهیسې بیا تر اوسه د افغانستان خلاف له بېلابېلو لارو دسیسې جوړوي.»
د سیاسي چارو کارپوه فیض محمد ځلاند وايي: « که چېرې د پاکستان په سیاسي جوړجاړیو کې د افغانستان په اړه د دوی نظریه بدله نه شي، ماته نه ښکاري چې پاکستان د اقتصادي، ټولنیز او سیاسي ټیکاو خپل کړي او یا دې افغانان ښه ورځ وویني.»
له افغانستان سره د پاکستان د سیاستونو په تړاو د دې پاخه او تجربه لرونکي سیاستوال څرګندونې داسې مهال دي چې د پاکستان حکومت د فضل الرحمن د څرګندونو خلاف، خپل هېواد د ترهګرۍ قرباني معرفي کړی او برعکس یې په تېرو څه باندې درېیو کلونو کې افغان لوری د دې هېواد ضد وسله والو ډلو پر ملاتړ تورن کړی.
