په داسې حال کې چې خوراکي نباتي غوړي د افغانستان له مهمو وارداتي توکو دي او تر ډېره له شمالي ګاونډیو هېوادونو واردېږی.
د هلمند صنعت او سوداګرۍ ریاست چارواکي وايي، په دې ولایت کې هره میاشت له پنبه دانې٣٠٠ ټنه نباتي غوړي تولیدېږي.
د دوی په خبره، هلمند ولایت د نباتي غوړیو له پلوه پر ځان بسیا شوی او تولید شوي غوړي یې تر بدخشان ولایت پورې استول کېږي.
د هلمند صنعت او سوداګرۍ ریاست کې د صنعتي پارکونو آمر فضل محمد فضلي وايي: « د اسلامي امارت له راتګ سره په هلمند کې د پنبې د پروسېس ډېرې کارخونې جوړې شوې او دا مهال یې شمېر له ۷۰ کارخونو اوښتی. دا کارخونې په یوه میاشت کې ۳ زره ۶۰۰ ټنه پنبه پروسېس کوي. د پنبه دانې له دې پروسېس هره میاشت ۳۰۰ ټنه غوړي ترلاسه کېږي. دا اندازه غوړي اوس مهال د هلمند ولس لپاره بس دي او پرځان بسیا شوی دی.»
د هلمند اوسېدونکي هم خوښ دي چې خپل ولایت کې د کروندګرو له محصولاتو د تولید شویو غوړیو ګټه اخلي.
دوی له چارواکو غوښتنه کوي چې د غوړیو د معیاري بسته بندۍ ترڅنګ د بیو ټیټولو په تړاو هم هڅې وکړي.
د هلمند اوسېدونکی بورجان وايي: « د کروندګرو لپاره ګټه لري، هغه دا چې کله دا ګران شي، پنبه هم ورسره ګرانېږي. خو موږ هیله لرو چې قېمتونه یې څه کم شي. اوس مهال پنبه ارزانه ده خو غوړي ګران دي؛ د دې علت څه دی؟ باید بیه یې ټیټه شي.»
د هلمند بل اوسېدونکی بریالی وايي: « زموږ غوښتنه دا ده چې دا غوړي سم بسته بندي شي او بیا بازار ته وړاندې شي. دا غوړي زموږ د خپل هېواد تولید دی او بله خبره دا ده چې په هره اندازه وغواړي، اخیستلی یې شې.»
هلمند کې له پنبې د غوړیو د تولید او پروسیس٧٠ کارخونې شته دي چې په ورځني ډول ترې١٠ ټنه غوړي لاسته راځي .
په دې کارخونو کې د غوړیو ترڅنګ صابون، کونجاړه او خالصه پنبه هم تولیدېږي او د هېواد بازارونو ته وړاندې کېږي.
