د روسيې ټاس خبري آژانس د دې هېواد د چارواکو له خولې لیکلي، روسيې تېر کال د شاوخوا ۳۰۰ میلیون ډالرو په ارزښت اوړه پلورلي چې لویه برخه يې افغانستان پېرلي دي.
دوی دې ته په کتو زياته کړې، له افغانستان سره يې په تېر۲۰۲۴ کال کې سوداګري د وړم ۲۰۲۳ کال پرتله۲۰ سلنه زياته شوې.
د روسیې د کرنیزو محصولاتو د صادرولو دولتي اداره وايي:« افغانستان تېر کال له روسیې د اوړو تر ټولو لوی واردوونکی هېواد پاتې شوی. د وړم کال پرتله یې د اوړو پېرل دوه برابره شوي.»
روسي چارواکو له ټاس خبرې آژانس سره په خبرو کې د سرپرست حکومت او روسيې په سیاسي اړیکو هم خبري کړې او دا اړیکې يې مثبتې یادې کړې دي.
هڅه مو وکړه په دې اړه د سوداګرۍ او کرنې وزارتونو د چارواکو نظرونه هم واخلو، خو مالومات یې را نه کړل.
له دې وړاندې، چارواکو په وار وار له روسيې سره په سیاسي، امنیتي او اقتصادي اړیکو کې د ښه والي ډاډ ورکړی و.
د اقتصادي چارو شنونکي وايي، اړتیا ده چې د زراعتې توکو له اړخه افغانستان پرځان بساینې ته ورسېږي او د وارداتو پر ځای يې صادرات زيات شي.
د اقتصادي چارو شنونکی نورالله عزیز وايي: « که چېرې دا سکټور ښه مدیریت شي، یانې دا چې په دې برخه کې د زراعت د مکانیزه کولو، د عصري ماشینونو د استعمال، کیمیاوي سرې، نویو تخمونو او نویو تولیداتو معرفي کول به هغه څه وي چې دا سکټور پر خپلو پښو ودروي. همدارنګه که چېرې د مارکېټ په برخه کې هم د کروندګرو لپاره فرصتونه برابر او عامه پوهاوی وشي، زه باوري یم چې دا به د داخلي مارکېټ ترڅنګ د بهرني مارکېټ لپاره هم په کافي اندازه تولیدات ولري.»
یو شمېر نور شنونکي بیا له روسيې سره د سوداګريزو اړیکو پراختیا د دواړو هېوادونو ترمنځ د مشترکاتو زیاتوالي لپاره مهمه بولي.
د اقتصادي چارو شنونکی محمد نبي افغان وايي: « که موږ وکولی شو روسیې ته د صادراتو پيل وکړو، موږ به وکولی شو په راتلونکي کې خپل اقتصاد پر پښو ودروو؛ ځکه تاسو وینئ چې روسیه، بېلاروس، ازبېکستان، قزاقستان او د ټولې مرکزي آسیا هېوادونه هڅه کوي چې په دې مهم وخت کې چې اروپا له دوی لاس اخیستی، اړیکې او تجارت یې سره خرابې دي، زموږ لپاره ښه زمینه برابره ده.»
د اقتصادي چارو شنوونکي ډېری افغانان پر کرنه او مالدارۍ بوخت دي نو اړینه ده چې امکانات ورته برابر شي، ترڅو افغانستان په یادو سکټورونو کې له مصرفي پر صادراتي هېواد بدل شي.
