د امریکا کلیفورنیا ایالت د مرکز لاس انجلس ښار لوېدیځ ته د ملیبو ساحلي ښارګوټي په یوه غرنۍ ځنګلي سیمه کې سه شنبه (د جنورۍ پر ۷ مه) اور ولګېد چې وروسته د شدیدو بادونو له امله ۵ نورو ناحیو ته پراخ شو.
د لاس انجلس ښار پولیسو ویلي، د اور لګېدنې له امله د مړو شویو شمېر۱۱ تنو ته رسېدلی او لسګونه نور ژوبل شوې دي.
د امریکا بېړنیو پېښو ته د رسېدو ادارې ویلي، د اورلګېدنې د مهار لپاره یې د دفاع وزارت په ګډون د یو شمېر ادارو زرګونه مسلکي پرسونل سیمه کې د اور پر وژنې بوخت دي.
د امریکا بېړنیو پېښو ته د رسېدنې ادارې رییسه دین کریسول وايي: « اوس مهال به ستونزمنه وي چې د ناورین د کره زیانونو په اړه پوه شو، ځکه موږ د دې ارزونه نه شو کولی چې څومره ودانۍ ویجاړې شوې دي. موږ پوهېږو چې زرګونه کورونه زیانمن شوي، خو لګښتونه هغه وخت په ډاګه کېږي چې مالومه شي څومره بنسټونه، سړکونه، د اوبو او برېښنا سیسټمونه او نور تأسیسات زیانمن شوي. کېدای شي میلیاردونه ډالره شي.»
بله خوا، د امریکا ولسمشر جوبایډن ویلي اور وژونکو ټیمونو یو شمېر سیمو کې د اور زياتې پراختيا مخه نېولې او په بشپړه توګه د اور وژنې لپار اوږده لاره پرته ده.
هغه زیاته کړې: « دغه اورلګېدنه تېره ورځ له مهار کولو لرې وه، خو نورو سیمو ته د اور لګېدنې د پراخېدو د مخنیوي په برخه کې لوی او واړه پرمختګونه شوي. په پادسادنا کې ۳ سلنه، د اوقیانوس په پالسیدیس برخه کې ۸ سلنه، وینټوریا کې ۳۵ سلنه او سیلمار ته ۳۷ سلنه د اور پراخېدو مخنیوی شوی. موږ لا هم لویه لاره په مخکې لرو او د اونیو لپاره د جدي ګواښ احتمالونه پرخپل ځای دي.»
په ورته وخت کې د ملګرو ملتونو عمومي منشي انټونیو ګوتېرېش د اورلګېدنې په اړه خواشیني ښودلې او د دې سازمان له لوري يې د همکاریو ډاډ ورکړی.
هغه په دې اړه ویلي: « زه د کلیفورنیا په ځنګلونو کې د اورلګېدنې له امله ویجاړیو غمجن کړی یم. د هغو کسانو له کورنیو سره خپله خواخوږي څرګندوم چې غړي یې له لاسه ورکړي. زموږ فکر د هغو لسګونه زرو په اړه دی چې کورونه یې ویجاړ شوي او بې ځایه کېدو ته اړ شوې دي. ملګري ملتونه به د اړتیا په صورت کې خپلې مرستې چمتو کړي.»
بله خوا، د امریکا نوی ټاکل شوی ولسمشر ډونالډ ټرمپ چې څه باندې یوه اوونۍ وروسته به د دې هېواد د ۴۷ ولسمشر په توګه لوړه وکړي، د بایډن اداره یې په کمزورو خدماتو رسولو او د اورلګېدنې په کابو کولو په پاتې راتګ تورنه کړې.
ټرمپ زیاته کړې: « دا یوه ریښتینې غمیزه ده. د بېورلي هېل سیمه او اړوند سیمې په بشپړه توګه ویجاړې شوې دي. لوی کورونه چې ځينې یې په نړۍ کې قیمتي کورونه دي له منځه تللي. دا یو غمیزه ده او دا د حکومت یوه تېروتنه او کمزوري ده چې د اور وژنې لپاره یې کافي اوبه نه دي کارولې.»
د امریکا کلیفورنیا ایالت سیمه ییزو چارواکو ویلي، د اوبو کمښت د اور وژنې پروسه له خنډ سره مخ کړې.
دوی په سیمه کې د خلکو له بې ځایه کېدو سره د کورونو لوټ کېدل هم یوه ستره ننګونه بللې او د دې چارې د مخنيوي لپاره يې د خلکو پر ګرځېدو بندیز لګولی.
