د نوي کابل ښار د پروژې په لومړي فاز کې د ۲.۶ پارسل برخه کې چې شاوخوا ۱۵سوه جرېبه ځمکه کېږي، د استوګن ځایونو جوړونې چارې پیل شوې.
چاوراکي وايي، دغه چارې به په ټولو نړیوالو معیارونو برابرې وي.
د دې پروژې ټولیز لګښت ۷۰۰ میلیونه ډالره اټکل شوی چې په دوو جلا برخو کې به تطبیق شي.
چارواکي زیاتوي، د دې پروژې په لومړۍ برخه کې به ۲۳ زره وګړو لپاره څه باندې څلور زره کورونه او همدا راز په بلې برخې کې به یې ۱۰ زره وګړو لپاره نږدې دوه زره کورونه جوړ شي.
د ګولډن سیټي شرکت مسوول فواد ساپی په دې اړه وايي: « د دې ملي پروژې په پلي کېدو سره به سلګونه کسانو لپاره شغلي فرصتونه برابر شي. دغه کار به نه یوازې د خلکو په ژوند کې ښه والی راولي بلکې د افغانستان د اقتصادي ودې لامل به هم شي. دغه پروژه چې ارزښت یې له ۷۰۰ میلیونو ډالرو لوړ دی، د اسلامي امارت، خصوصي سکټور او زحمت کشو کارګرانو ترمنځ د کډ کار او همکاریو پایله ده.»
د کور او ښار جوړونې وزارت چارواکي وايي، د نوي کابل ښار د ځمکو استملاک چارې په ښه توګه روانې دي او د یوه ځانګړي مکانیزم له لارې د دغو ځمکو ټولې حقوقي ستونزې هوارې شوې دي.
د کور او ښار جوړونې وزارت سرپرست حمدالله نعماني وايي: « موږ هڅه وکړه چې په دوو کالو کې داسې مکانېزم جوړ کړو چې ټولو حقوقي مسایلو ته ځواب ویونکی وي. زه خلکو ته اعلان کوم، که دلته په نوي کابل کې یوه لوېشت هم لري، ماته دې راشي زه دا زمینه ورته برابروم چې یا خپله کار په کې وکړي او یا د بل پانګواله په وسیله کار وکړي او په راتلونکي کې هېڅ ډول حقوقي ستونزه هم ونه لري. دېته به اړتیا پيدا نه شي چې څوک حوزې یا کوم بل ځای ته عریضه وکړي.»
د کور او ښار جوړونې وزارت مالي او اداري معین محمد ارسلا خروټی وايي: «د خلکو د دغو ځمکو د تصفیې لپاره دولتي کمیسیون په دې کار کوي چې ټولې ستونزې هوارې او د خلکو ځمکې استملاک کړي. دغه کار تر اوسه په ښه توګه روان دی.»
په ورته وخت کې، د ریاست الوزراء اداري مرستیال عبدالسلام حنفي وايي، د نوي کابل ښار د پروژې په بشپړېدو سره به افغانستان د سیمې پر کچه په ستر سوداګریز مرکز بدل شي او اقتصاد به یې پرمختګ وکړي.
حنفي زیاتوي: «د کابل نوي ښار پروژه یوه لویه ملي پروژه ده چې پلي کېدل به یې زموږ په ځورېدلې ټولنه کې ستر اقتصادي او ټولنیز تحول راولي. دغه پروژه به د سیمې په یوه تجارتي مرکز د افغانستان له بدلولو سره مرسته وکړي. په دې پروه کې په ټولو سکټورنو او په ځانګړې توګه انرژۍ، اوبو، سړکونو، کرنې او نورو برخو کې د پراخو فعالیتونو درلودونکې ده.»
اخوا د بهرنیو تچارو وزارت سیاسي معین شېر محمد عباس ستانکزی بیا له بهر مېشتو افغان پانګوالو غوښتنه کوي چې د خپل هېواد په بیا روغونه کې ونډه واخلي او خپلې پانګې افغانستان ته انتقال کړي.
ستانکزی په دې اړه وايي: « نورو ملکونو ته تمه مه کوئ چې له هغه ځایه پیسې راشي او افغانستان پرې آباد شي. زه په خپلو هغو افغانانو باندې غږ کوم چې په خارج کې پانګې لري، دا په دوی فرض دی او وظیفه یې ده چې خپلې پانګې افغانستان ته راوړي او دلته پانګونه وکړي. که هرڅوک په دې وخت کې په نورو ملکونو کې پانګونه کوي او هغه ملکونه آبادوي، دا به له دې خاورې سره لویه جفا وي.»
د کابل نوی ښار به په ۳۰ کالو کې پر۷۴۰ کیلومټره مربع ځمکې جوړ شي. دغه ښار به د درې میلیونه وګړو د استوګنې ظرفیت ولري او له اوسني کابل ښار به یو نیم برابر لوی وي.
