د کرېکټ ملي لوبډله له بنګله دېش لوبډلې څخه د یو ورځنیو لوبو د لوبلړۍ له ګټلي جام سره د چهارشنبې پر ورځ د (۱۴۰۳ کال د لړم پر ۲۳ مه) هېواد ته راستانه شوه.
په کابل کې د ملي لوبډلې د اتلولۍ نمانځنې لپاره مراسم نيول شوي او ګډونوال د ملي لوبغاړو له لوري د ښه مديريت او غوره لوبې ستاینه کوي.
د یو ورځنیو لوبو لوبډلمشر هم مني چې له بنګلدېش لوبډلې سره په ترسره کړو وروستيو لوبو کې يو لړ نيمګړتياوې وې، خو په خبره يې له زمبابوې لوبډلې او دغه راز د چمپين ټرافي سياليو وړاندې به د دغو نیمګړتیاوو د پوره کولو هڅه وشي.
لوبډلمشر حشمتالله شهیدي وايي: « موږ ته اسانه نه و، خو په هر حال موږ باید په سټرایک روټېشن باندې نور کار هم وکړو؛ ځکه چمپين ټرافي را روانه ده او د دې لپاره موږ له زیمبابوې سره یو بل سریز هم لرو. کرېکټ بورډ خبرې روانې کړې او ښايي یو بل سریز هم ولرو. دا به زموږ لپاره ډېر ښه وي او هڅه به کوو چې پر هغو ځایونو کار وکړو چې نیمګړتیاوې او مشکلات په کې لرو.»
لوبډلمشر ډاډ ورکوي چې د کرېکټ نړيوالې شورا په نوښت د راتلونکي کال په فبرورۍ کې د چمپين ټرافي سياليو لپاره بشپړ چمتووالی لري او ملي لوبډله به له خپل ظرفيت په ګټنې سره ښې لوبې نندارې ته وړاندې کړي.
شهیدي تمه لري توپ اچوونکی مجيب الرحمن ځدراڼ او توپ وهونکی ابراهيم ځدراڼ چې دا مهال یې درملنه روانه ده، د چمپین ټرافي تر سياليو پورې له ملي لوبډلې سره يو ځای شي.
هغه په دې اړه وايي: « د ابراهیم تشه محسوس کېده، ځکه هغه پنځه که شپږ سلیزې وهلې دې او بله خبره دا ده چې له ګربز سره یې کمبېنېشن ډېر ښه جوړ دی. مجیب هم له ډېر وخت راهیسې د ګوتې له خوا ژوبل دی او درملنه یې ډېره اوږده شوه. خدای وکړي ډېر ژر روغ شي او ټیم ته راشي؛ ځکه د ټیم اړتیا ده. د کرېکټ بورډ له خوا د هند ممبی ته استول شوی او تمه لرو چې ژر تر ژره روغ شي او لوبډلې ته راشي. »
د کرېکټ نړيوالې شورا د درجۍ بندۍ له مخې، افغانستان او بنګله دېش ملي لوبدلې ۸۵ امتيازونه لري، خو افغانستان د ځینو نورو امتیازونو له مخې له بنګله دېش یو څه مخکې دی.
له دې سره جوخت، د ملي لوبډلې پيليزتوپ وهونکی صدیقالله اتل وایي، ډاډ دی چې په راتلونکو نړيوالو سیالیو کې به لا ښه وځلیږي.
اتل زیاتوي: « تر هغو چې له نړیوال کرېکټ سره عادت کېږې، لږ وخت ته اړتیا ده. زه پوره کوښښ کوم چې له سینیر لوبغاړو زده کړه وکړم او تجربې یې واخلم. هو! نیمګړتیاوې خامخا شته، خو زه پوره هڅه کوم چې بل ځل لوبډلې ته راځم، نو له یوه ښه مورال سره راشم او ښې لوبې وکړم.»
د افغانستان ملي لوبډله روان کال په یو ورځنیو سیالیو کې له نورو لوبډلو سره هم لوبې لري. ټاکل شوې افغان ملي لوبډله زېمبابوې ته سفر وکړي او له د دې هېواد له ملي لوبډلې سره به د ډسمبر له نهمې د درې ش۲۰ اووریزو، درې ۵۰ اووریزو او دوو ټېسټ لوبو لړۍ پیل کړي.
