د عامې روغتیا وزارت مسوولین وايي، د کابل په ګډون په ټولو ولایتونو کې يې تر دې مهاله د شري شاوخوا ۶زره مثبتې پېښې ثبت کړې چې دغه شمېرې د تېر کال پرتله زیاتوالی ښيي.
د دغه وزارت ویاند ډاکټر شرافت زمان وايي، په روان کال کې د شري ناروغۍ د مشکوکو پېښو له ۱۰ زرو ډېرو ازموینو له ډلې نږدې شپږ زره مثبتې ثبت شوې دي.
هغه زیاتوي: « دا چې شری یوه ساري ناروغي ده، په افغانستان کې هم ځینې وختونه ماشومانو کې د دغې ناروغۍ ګراف پورته کېږي. د تېر کال په پرتله سږ کال له موږ سره د مشکوکو واقعیاتو ګراف یو څه اندازه لوړ دی. په همدې اساس زموږ سرویلانس ټیمونو چې څومره نمونې اخیستې دي، نسبت تېر کال ته له موږ سره د مثبتو پېښو ګراف هم پورته شوی. سږ کال له موږ سره تایید شوي واقعیات نږدې۶ زره دي.»
زمان وايي، د شري ناروغۍ د مخنيوي په موخه تېر کال هم فرعي واکسينونه ماشومانو ته تطبيق شوي او ټاکل شوې په راتلونکي ۲۰۲۵ کال کې هم شاوخوا ۱۶ میلیونو ماشومانو ته د يادې ناروغۍ پر وړاندې د خوندیتوب واکسين ورکړل شي.
زمان په دې اړه وايي: « په نږدې میاشتو کې پلان لرو چې د شري واکسین ملي کمپاین تطبق کړو. په دې سره به موږ وکولی شو چې په افغانستان کې د شري ناروغۍ د زیاتېدونکو واقعیاتو مخنیوی وکړو.»
د عامې روغتیا وزارت مسوولین له ولسونو هم غوښتنه کوي، که ماشومانو کې یې د شري نښې را ښکاره کېږي، باید نور ماشومان ترې لرې وساتي او په دغو حالاتو کې روغتیايي مرکزونو ته مراجعه وکړي، ترڅو د ماشومانو ژوند له ګواښ سره مخامخ نه شي.
