د پاکستاني طالبانو تحریک یا ټي.ټي.پي یو ځل بیا ادعا کړې چې تېره میلادي میاشت کې یې په پاکستانې پوځیانو ۲۶۲ بریدونه کړي چې په کې ۳۲۶ تنو امنیتي او نظامي ځواکونو ته مرګ ژوبله اوښتې. د پاکستاني طالبانو تحریک له خوا خپره شوې خبرپاڼه کې راغلي، په دغو بريدونو کې لایزري وسلې، لاسي بمونه، یرغلیز او هدفي بریدونه شامل دي.
د ټي.ټي.پي خبرپاڼه زیاتوي: « په تېرې سپټمبر میاشتې کې د پاکستان پر امنیتي ځواکونو۲۶۲ بریدونه شوي چې له امله یې ۱۳۷تنه وژل شوي او ۱۸۹ تنه نور ټپیان دي. په دغو بريدونو کې لایزري وسلې، لاسي بمونه، یرغلیز، ځوابي، هدفي او توغندویز بریدونوشامل دي.»
د دغو بریدونو ډېره برخه په خیبرپښتونخوا، بلوچستان او سویلي پنجاب کې ترسره شوي دي.
د ټي ټي پي د معلوماتو له مخې، په دغو بریدونو کې د پاکستان د پوځ او پولیسو تأسیسات هم ویجاړ او مهماتو ته یې زیان اوښتی دی.
ټي.ټي.پي په خپله اعلامیه کې زیاته کړې: « په دې برېدونو کې مو د پاکستان د پوځ او پولیسو سرتېري وژلي، کشفي کمرې، پوځي وسایط، ډرون کمرې، پوځي ودانۍ او نور پوځي مهمات ويجاړ کړي دي. دغه بریدونه په خیبر پښتونخوا، بلوچستان او سویلي پنجاب کې ترسره شوي.»
د پاکستان حکومت د ټي.ټي.پي تازه خپرې شوې اعلاميې ته غبرګون نه دی ښودلی خو په افغانستان کې د امنیتي چارو کارپوهان په ګاونډ پاکستان کې ناامني او ټي.ټي.پي سره جګړه د پاکستان د غلطو پالیسیو پایله ګڼي.
د چارو شنونکی کامران امان وايي: « دا د پاکستان داخلي ستونزه ده؛ زما په اند، ټي.ټي.پي د سیمې په کچه مسئله نه ده او دوی کولی شي خپلې ستونزې په خپله حل کړي. خو په موږ ځکه اغېز کولی شي چې زموږ ګڼ شمېر مهاجران په پاکستان کې دي او خلک مو د تجارت لپاره تګ راتګ کوي. زه هیله لرم د پاکستان حکومت په دې اړه سم سیاست غوره کړي.»
د چارو شنوونکی زلمی افغانیار وايي: « هغه حاکمیت چې د خپلو خلکو غږ وا نه وري، ښکاره خبره ده چې له ستونزو سره مخامخ کېږي. د پاکستان خلک د شریعت تطبیق غواړي خو حکومت له دوی سره په تقابل کې دی. د پاکستان پوځ له امریکا سره په ګډه د خپلو خلکو پر ضد دښمنانه پروګرامونه لري، نو ښکاره خبره ده چې له ستونزو سره به مخامخ کېږي.»
دا په داسې حال کې ده چې پاکستان تل تور پورې کړي چې د ټي.ټي.پي پټنځایونه په افغانستان کې دي او د افغانستان حکومت له خوا یې ملاتړ کیږي. هغه ادعا چې تل اسلامي امارت رد کړې او له ټي.ټي.پي سره د پاکستان د پوځ جګړه یې د دې هېواد داخلي موضوع بللې.
