په داسې حال کې چې ټاکل شوې، د پښتون ژغورنې غورځنګ په نوښت د اکټوبر پر ۱۱مه خیرپښتونخوا کې د پښتنو قومي عدالت لپاره جرګه جوړه شي، ورسره سم د پاکستان حکومت له خوا د دې غورځنګ د مخکښو مشرانو نيول پيل شوي دي.
په يوه تازه اقدام کې د پښتون ژغورنې غورځنګ مخکښ غړی علي وزير له اډياله زندانه ترخوشې کېدو څو شېبې وروسته بېرته نيول شوی.
د دې غورځنګ مشر منظور احمد پښتین ویلي، علي وزير په درېیو قضیو کې د محکمې له لوري له برائت اخیستو وروسته له زندان آزد شو، خو سملاسي بېرته نيول شوی او نامالوم ځای ته لېږدول شوی دی.
د پښتین په خبره، علي وزیر د پنجاب اعلی وزیرې مريم نواز په امر نيول شوی او په دې اړه هېڅ مالومات نه شته چې چېرته يې لېږدولی دی.
پښتین په دې اړه وايي:« په داسې حال کې چې محکمې څو ځلې د علي وزیر د آزادېدو ضمانت منلی، خو علي وزیر بې له کوم څرګند لامل د پنجاب اعلی وزیرې مریم نواز په امر نیول کېږي او بېرته زندان ته اچول کېږي. مریم نواز له پښتنو سره د تعصب او ظلم له امله علي وزیر د درېیم ځل لپاره زنداني کوي.»
په ورته مهال، د پښتون ژغورنې غورځنګ غړي وايي، د پاکستان حکومت له لوري د دې غورځنګ د مخکښ کسانو نېونه او د ترور لپاره یې د دسیسو جوړول دوام لري.
دوی د پښتنو حقونو لپاره خپلې مبارزې ته په اشارې وايي، د پاکستان له لوري له پښتنو سره د روانې بې عدالتۍ پر وړاندې ولاړ دي او چوپه خوله نه پاتې کېږي.
د پښتون ژغورنې غورځنګ د مرکزي کمېټې غړی زبېرشاه آغا وايي: « د پاکستان حکومت د علي وزیر نیولو لپاره د ترهګرۍ اړوند درې دروغینې مقدمې جوړې کړې وې، خو نوموړی له دغو ټولو مقدمو سپین راووت. اوس یو ځل بیا د پنجاب حکومت د مشرې مریم نواز په امر بیا نیول شوی او جلیم زندان ته لېږدول شوی دی. له پښتنو سره د روان ظلم پر وړاندې به مقاومت کوو او د اکټوبر ۱۱ مه جرګه کې به پرېکړه کېږي.»
د سیاسي چارو کارپوهان د لر او بر افغانانو تېرو جرګو او د اکټوبر پر ۱۱ مه د پښتون ژغورنې غورځنګ جرګې ته په اشارې وايي، د پاکستان حکومت همیشه هڅه کړې، څو د پښتنو مشرانو په ترور او زنداني کولو سره د پښتون قومونو یووالی له منځه یوسي.
د سیاسي چارو کارپوه کمال ناصر اصولي وايي: « اتحاد او اتفاق د ټولو پښتنو او په ځانګړې توګه د اکټوبر ۱۱ مې جرګې اړوند مشرانو لپاره یو مهم ګام دی. باید په دې جرګه کې اکثریت ملت پال پښتانه راټول شي او د پښتنو د حقونو غږ پورته کړي. په دې اړه پخوا هم جرګه شوې وه چې د پنجاب له خوا وځپل شوه؛ اوس هم هڅې روانې دي چې دغه جرګه هم وځپل شي او هغه کسان تررو شي چې دغه جرګه یې رابللې ده.»
د سیاسي چارو کارپوه حکمتالله حکمت وايي: « هغه څه چې نن پر پښتنو باندې تېریږي، له فلسطین څخه هم اوږد تاریخ لري. له پښتنو سره روان ظلم د امریکا او انګرېزانو په لاس جوړ شوي سیسټم او استعمار میراث دی. پاکستان په اصل کې د ترهګرۍ یوه بڼه ده او پښتانه ورسره په مبارزه بوخت دي.»
دا په داسې حال کې ده چې د پښتون ژغورنې غورځنګ یو شمېر غړي وايي، منظور پښتین ته هم امنیتي ګواښونه متوجه دي او د ترور هڅې يې روانې دي.
