د پاکستان ډاڼ ورځپاڼې په خپله وروستۍ ګڼه کې په سیمه ییزه او نړیواله کچه د پاکستان اوسني سټراتېژیک او سیاسي اعتبار ته کتنه او تبصره کړې.
د ورځپاڼې په باور، پاکستان دا مهال د افغانستان موضوع او هند سره د کشمیر مساله کې خپل پخوانی نفوذ بایللی او اوس له شاتګ سره مخامخ دی.
ورځپاڼه زیاتوي، سره له دې چې پاکستان په تېرو ۲۰ کلونو کې په افغانستان کې د امریکا پر مشرۍ د ناټو غړیو هېوادونو سره همکار او مرستندوی پاتې شوی؛ خو د ناوړه او کمزوري اقتصاد، سیاسي بې ثباتي، تلپاتې ننګونو، کمزورې حکومتوالۍ، پرله پسې امنیتي ګواښونو او د ستراتيژیکې سرګردانۍ له امله یې په سیمه او نړۍ کې خپل اعتبار له لاسه ورکړی.
د ډان ورځپاڼې د مقالې یوه برخه:« د سپټمبر نهمې او یوولسمې پېښو دغه څه په ډراماټیک ډول بدل کړل. پاکستان یو ځل بیا د ترهګرۍ پر وړاندې جګړه کې د لومړۍ کرښې رول ولوبوه. دې کار پاکستان ته وړتیا ورکړه چې د دوو لسیزو لپاره د افغانستان د جګړې په لومړۍ کرښه کې د امریکا پر مشرۍ د ناټو غړیو هېوادونو سره مرسته او همکاري وکړي.»
د ډان ورځپاڼې مقاله کې ویل شوي، چې نړیوالې انزوا له چین سره د پاکستان توده اقتصادي او سیاسي ملګرتیا هم له جدي ننګونو سره مخ کړې.
د ورځپاڼې په باور، پاکستان یو پورغوښتونکی او پوروړی هېواد دی او د خپلې فزیکي بقا لپاره یې ټول تمرکز له شتمنو عرب هېوادونو څخه د پورونو ترلاسه کولو ته ورټول کړی.
د ډان ورځپاڼې د مقالې یوه برخه: « پاکستان د افغانستان او کشمیر په ګډون په ګڼو جبهو کې له شاتګ سره مخ شوی. هغه هېواد چې یو وخت په منځني ختیځ کې فعال ډېپلوماټیک لوبغاړی و، نن ورځ یې د ښکېلتیا اصلي اصول او موخه له شتمنو عرب هېوادونو څخه د پورونو اخیستل ګرځېدلي.»
د سیاسي چارو شنونکي وايي، د پاکستان اوسنی وضعیت په سیمه کې تر ډېره د امریکا له وتو او په سیاسي او ډیپلوماټیکه برخه کې د دې هېواد د ناسمو پالیسیو پایله ده چې په تېر کې یې له ترهګرۍ سره د مبارزې په پلمه له لویدیځ څخه میلیاردونه ډالر ترلاسه کړي دي.
د دوی په باور، اوس چې امریکا له سیمې وتلې او نړیوالې ټولنې هم د پاکستان سیاستونه درک کړي، خپل تېر ملاتړ یې له لاسه ورکړی او له امله یې دا مهال له سیاسي او اقتصادي انزوا سره مخ دی.
د سیاسي چارو شنوونکی اخترمحمد راسخ وايي: « نن چې پاکستان له سیاسي، اقتصادي او نظامي بحرانونو سره مخامخ دی، علت دا دی چې دوی اوس خپل کرلي رېبي. دوی نړۍ او سیمې ته بې اعتباره شوي؛ ځکه چې اوس غربي نړۍ مرسته نه ورکوي.»
ډاڼ ورځپاڼې په خپله وروستۍ ګڼه کې د پاکستان اوسني سټراتېژیک او سیاسي اعتبار او تیرو سیاستونو په تړاو دغه مقاله داسې مهال خپروي، چې پاکستان دمګړۍ په ګڼو برخو کې له جدي ستونزو او ننګونو سره مخ دی.
دغه هېواد په اقتصادي برخه کې د دېوالي کېدو له ګواښ سره مخ دی او له سیاسي اړخه یې په تېرو درېیو کلونو کې درې حکومتونه تجربه کړي چې همدې سیاسي بېثباتۍ هلته ناامني ډېره کړې او په دې ټولو سربیره وسلهوالې ډلې په کې هره ورځ پر امنیتي ادارو او ځواکونو بریدونه کوي.
