د افغانستان د اقتصادي پرمختګ او بریا په نوم جوړ نندارتون کې، چې د څلورو ورځو لپاره به په ۴۰۰ غرفو کې وطني توليدات او لاسي صنایع نندارې او بازار موندنې ته وړاندې کړي، ۱۵۰ غرفې ښځو ته ځانګړې شوې دي.
دغه نندارتون ته له پروان او بلخ ولایتونو راغلې سوداګرې او صنعت کارانې شکایت کوي، چې لاسي صنایع يې په کور دننه د خرڅلاو بازار نه لري او لامل یې دا دی، چې خلکو ته کافي عامه پوهاوی نه دی ورکړل شوی.
دوی له سرپرست حکومت او بهرنیو موسسو غوښتنه کوي، چې د لاسي صنایعو لپاره يې په بهر کې بازار موندنه وکړي.
سوداګره لیا راسخ وايي: « زموږ لاسي صنایع په بهر کې ډېر ارزښت لري،خو له دې امله ارزښت نه لري، چې په افغانستان کې د خپلو تولیداتو کارونې لپاره فرهنګ سازي نه ده شوې. دا ډول نندارتونونه مرسته کوي، چې خلک د خپلو تولیداتو کارونې ته وهڅېږي.»
سوداګره حدیثه نوري هم د کورني بازار له سوړوالی شکایت لري او وايي:« زه بلخ ولایت څخه راغلې یم او دا دی لاره هم راباندې بنده او کرایې لوړې شوې. نن دویمه ورځ ده، خو هېڅ مې نه دي پلورلي.»
همدې نندارتون کې د کابل او دایکنډي ولایتونو ګډونوالې وايي، دا ډول نندارتونونه کولی شي د ښځو په کاروبار مثبت اغېز ولري او لاسي صنایعو ته ښه بازار موندنه وکړي.
دوی غوښتنه کوي، چې سرپرست حکومت دې په کور دننه د دا ډول نندارتونونو تر څنګ بهرنیو هېوادونو کې هم افغان سوداګرو او صنعتکارو ښځو ته زمېنه برابره کړي، چې خپل تولیدات او لاسي صنایع د هغوی په نندارتونونو کې نندارې ته وړاندې کړي.
سوداګره انېلا وایي: « خلک باید زموږ غږ واوري او وویني چې ښځې څومره زحمت باسي او کار کوي. زه هڅه کوم د خپلو محصولاتو کچه او کیفیت لوړ کړم.»
بله خوا، د صنعت او سوداګرۍ وزارت چارواکي وايي، له نندارتون څخه موخه دا ده، چې خلک له داخلي تولیداتو سره وپېژني او ښه بازار موندنه ورته وشي.
دوی وايي، ټاکل شوې ډېر ژر په څلور هېوادونونو کې په نړیواله کچه نندارتونونه جوړ شي او په کې به افغان سوداګرو او صنعتکارو ښځو ته هم برخه ورکړل شي.
د صنعت او سوداګرۍ وزارت د نړیوال تجارت رئیس محمد زبير دین پرور وايي: «موږ خپلې خوندې هېڅکله جلا نه دي ګڼلې. اسلامي امارت غواړي زموږ سوداګرې او صنعتکارې ښځې په ټولو نندارتونونو کې ونډه ولري. لکه څرنګه چې موږ په ازبېکستان، تورکمنستان، قزاقستان او چین کې ښځو ته د ګډون زمینه برابره کړې وه، نږدې راتلونکې کې به د ګاونډیو هېوادونو په جوړېدونکو نندارتونونو کې هم د ګډون زمینه ورته برابره کړو.»
دین پرور له خلکو غوښتنه کوي، چې له دې نندارتون څخه ليدنه وکړي او نور خلک دې ته وهڅوي ترڅو د هېواد د اقتصادي ودې لپاره له وطني تولیداتو ګټه واخلي.
د افغانستان د اقتصادي پرمختګ او بریا په نوم دغه نندارتون د څلورو ورځو لپاره په پلازمېنه کابل کې جوړ شوی او ۴۰۰ غرفو کې افغاني تولیدات او لاسي صنایع نندارې ته اېښودل شوي دي.
