د ټاکنيزو منډو ترړو پرمهال د امريکا مخکېني ولسمشر ډونالډ د ترور هڅې په دې هېواد کې پر کشفي ادارو نيوکې زياتې کړې او پر کانګرس سربېره عام امريکايان هم د ولسمشر جوبايډن له ادارې وضاحت غواړي، چې څنګه د ولسمشريزو ټاکنو نوماند د ترور هڅه په نطفه کې نه ده شنډه شوې؟
اوس تازه د امريکا عدليې وزارت په دې اړه د څېړنې په يایله کې ۴۶ کلن اصف مرچنټ چې د پاکستان تبعه دی، په دې پېښه کې پر لاس لرلو تورن کړی.
دغه وزارت ویلي، مرچنټ په اپریل کې له یوه کس سره اړیکه نيولې او ترې په دې پېښه کې د همکارۍ غوښتنه کړې، خو نوموړي کس د همکارۍ برعکس پوليسو ته اطلاع ورکړې.
د وزارت په خبره، مرچنټ د ايران له لوري د پيسو په مقابل کې ګومارل شوی او په دې توګه تهران له واشنګټن څخه د قاسم سليماني د ترور د غچ اخيستلو هڅه کوله.
دغه وزارت زیاتوي:« په هغې جنایي دوسیې کې چې د نیویارک په بروکلین محکمې کې اصف مرچنټ ته پرانیستل شوې، ویل شوي چې مرچنټ په متحده ایالتونو کې د خلکو د استخدام په لټه کې و، څو د ایران د سپاه پاسداران ځواکونو د وژل شوي قوماندان قاسم سلیماني غچ واخلي.»
د سیاسي چارو کارو پوهان وايي، په دې پېښې سره ډېر مسووليت پاکستان ته هم راجع دی او په خبره يې له دې سره يې په ترهګرۍ کې د لاس نه لرلو په برخه کې باور راکم شو.
د سیاسي چارو کارپوه توریالی ځاځی وايي:« پاکستان اوس خپل اعتماد په نړۍ کې له لاسه ورکړ، امریکا اوس نه شي کولی د پاکستان ملاتړ وکړي، ټولې نړۍ ته ثابته شوه، چې پاکستان د تروریستي ډلو ځاله ده. امریکا اوس باید هغه لوبې ترسره کړي، د پاکستان مسوولیت له خپل سر خلاص کړي.»
ځېنې نور بیا وايي، د امريکا پر مخکنېي ولسمشر ډونالډ ټرمپ شوي برېد کې د پاکستاني وګړو ښکېلتيا دا ثابتوي، چې پاکستان د ترهګرۍ د ترويج لوی ادرس دی او اړتيا ده، چې له ترهګرۍ سره د مبارزې په نړيوالو هڅو کې پر پاکستان فشارونه زيات شي.
په نړيواله کچه په ترهګريزو او هدفي بريدونکو کې د پاکستاني وګړو ښکېلتيا نوې خبره نه ده، خو کارپوهان ټينګار کوي، چې د ترهګرۍ په تمويل او تجهيز کې د پاکستان کرادار ته په کتو، ښايي په بريدونو کې د دې هېواد د وګړو ښکېلتيا دوامداره شي او د مخنيوي لپاره يې اړتيا ده، چې نړيوال د پاکستان په اړه خپل ليدلوری بدل کړي.
