د حماس غورځنګ سیاسي دفتر مشر اسماعیل هنیه چې دوه ورځې وړاندې په ایران کې له یو ساتونکي سره ژوند له لاسه ورکړ، د جنازې لمونځ یې په قطر کې ادا او دغه هېواد کې خاورو ته وسپارل شو.
د ډاکتر اسماعیل هنیه د جنازې مراسمو کې د ګڼو هېوادونو مشرانو او د جهادي ډلو رهبرانو ګډون کړی و، چې د افغانستان په استازیتوب د اسلامي امارت د ریاست الوزرا سیاسي مرستیال مولوي عبدالکبیر د یو پلاوي پر مشرۍ ورغلی و.
د نړۍ یو شمېر هېوادونو د اسماعیل هینه وژنه غندلې او خبرداری ورکړی چې دا به په منځني ختیځ کې جګړه زیاته کړي.
د مصر د بهرنیو چارو وزیر ویلي:« د هنیه وژنه په سیمه کې د کړکیچ ممکنه زیاتیدو لامل کېدی شي او په غزه کې د اوربند په خبرو کې د پرمختګ نشتوالي وضعیت نور هم پیچلی کوي.»
د ترکیې ولسمشر رجب طیب اردوغان وايي:« د دې شرمناک عمل هدف د فلسطین د ملت د غزې د سپیڅلي مقاومت او زموږ د فلسطیني وروڼو عادلانه مبارزه له منځه وړل او د فلسطینانو وېرول دي.»
د چین د بهرنیو چارو وزارت ویاند لین جیان د هنیه پر وژنه ژوره اندیښنه څرګنده کړې او ویلي یې دي چې بیجینګ د دې عمل کلک مخالف دی.
هغه زیاته کړې:« موږ د دې وژنې سخت مخالف یوو او غنده یې کوو. په غزه کې باید ژر تر ژره هر اړخیز او دایمي اوربند وشي.»
اسماعیل هنیه د چهار شنبې پر ورځ د تهران په شمال کې له خپل یوه ساتونکي سره په یوه برېد کې خپل ژوند له لاسه ورکړ.
د حماس غورځنګ مشر د جنازې مراسمو کې د ایران ولسمشر مسعود پژکیان او ګڼو چارواکو سربېره شاوخوا دوه میلیونه کسانو ګډون کړی و.
د ایران مذهبي مشر علی خامنه یي د اسماعیل هنیه د وژنې د غچ اخیستلو خبرداری ورکړی دی.
