د جولای ۳۰ مه د انساني قاچاق مخنیوي نړیوالې ورځې سره بر اره ده.
انساني قاچاق د بشري حقونو په برخه کې د تاوتریخوالي يوه عمده پديده ده، چې د ملګرو ملتونو د منشور له مخې منعه او جرم ګڼل شوې.
د ملګرو ملتونو کډوالۍ نړيوالې ادارې (ای.او.ایم) ویلي، د دوی موندنې ښيي چې په تېرو کلونو کې د لويانو ترڅنګ ماشومان او په ځانګړې توګه نجونې د يادې پديدې قرباني شوي دي.
د کډوالو نړیوالې ادارې په خبره، پر نړيواله کچه د انساني قاچاق قرباني شویو درېيو کسانو له ډلې، يو هغه يې ماشوم دی.
دې ادارې د سویډن په نوښت د انساني قاچاق او د لاملونو مخنیوي لپاره يې شوې هڅې ستایلي او په دې برخه کې پر نړیوالۍ همغږۍ او اغېزناکو تګلارو یې ټینګار کړی.
دغې ادارې زیاته کړې:« دا چې د انساني قاچاق مخنیوی نړیوال عامه پوهاوي ته اړتیا لري، نو موږ له خپلو ملاتړو سره پر ګډ هڅو کوو، څو د انساني قاچاق مخنیوي په برخه کې ډېر کار وکړ. د سویډن بشري ځواک د پیاوړتیا ادارې د انساني قاچاق مخنیوي په برخه کې مهم رول ادا کړی او په فنلنډ کې د ملګرو ملتونو د کډوالۍ برخې مالي ملاتړ ترڅنګ یې، له هغو خلکو سره مرسته کړې، چې بېرته خپلو سیمو ته راستانه شوي او اوس مهال د درېیو قرباني کسانو له ډلې يو يې ماشوم دی.»
افغانستان هم یو له هغو هېوادونو دی، چې زرګونه ځوانان یې د مختلفو لاملونو له مخې، اروپا، امریکا او یو شمېر نورو هېوادونو ته په ناقانونه توګه له ورتګ سره د انساني قاچاق قرباني شوي دي.
د سیاسي چارو یو شمېر شنونکي بیا د انساني قاچاق او پر قاچاقي لارو نورو هېوادونو ته د ورتګ لاملونه په هېواد کې د بې روزګارۍ لوړه کچه او د تعلیم په برخه کې شته محدوديتونه یادوي او له سرپرست حکومته غواړي، چې دغه ستونزې حل کړي.
د سیاسي چارو شنونکی ادریس محمدي ځاځی وايي:« دلته قوي احصایه او رسېدنه دغو ستونزو نه پخوانيو حکومتونو او نه هم حاکم حکومت کړې. په لومړي قدم کې باید قوي احصایه ګیري وشي، چې دا ځوانان ولې له هېواده ځي، د څه لپاره ځي، لوی لاملونه یې څه دي، د دې لویو لاملونو لپاره حلارې څه دي، ترڅو ځوانان له دغو وحشي لارو خوراک نه شي.»
دا چې له افغانستان پر قاچاقي لارو د تللو کسانو په اړه کره شمېرې نشته، خو هغه افغان ځوانان او کورنۍ، چې د قاچاق په وسیله ګاونډیو هېوادونو او له هغه ځایه نورو اروپايي هېوادونو ته د تللو هوډ لري، ډېری یې په لارو کې د مرګ له ګواښ، شکنجو او غیر انساني چلن سره مخ کېږي.
