د کفر ویونکې مېرمنې مدافع وکیل هالند ته وتښتېد
محمد ص ته د سپکاوي کوونکې مېرمنې مدافع وکیل هالنډ ته وتښتید.
پاکستان کې د آسیه بي بي مدافع وکیل وايي، ملګروملتونو ورته ویلي چې ژوند ته یې ګواښ پیښ دی او باید هیواد پریږدي.
اخوا په پاکستان کې یو شمیر ګوندونه وايي حکومت له یوه ګوند سره تړون کړی او دا موضوع د ټول اسلامي امت پورې اړه لري.
د آسیه بي بي مدافع وکیل وايي، درې ورځې په اسلام اباد کې د اروپايي ټولنې سفارت کې و خو نه یې غوښتل چې هیواد پریږدي.
د آسیه بي بي مدافع وکیل، سیف الملوک وویل، ((زما په ستره محکمه ملګري شته او هغوی زه په اسلام اباد کې د اروپايي ټولنې سفارت ته ورسولم، زه هلته درې ورځې وم، هغوی زما د تمې خلاف ماته ویل چې باید هیواد پریږدم، خو ما ورته ویل چې تر څو آسیه خوشې نه شي زه له هیواده نه وځم.))
سیف الملوک وايي، هغه به ډير خوشاله وای که اسیه بي بي هم ورسره وای خو ورته ویل شوي و چې نښه ګرځيدلی او ژوند ته یې ګواښ دی. سیف الملوک وايي تر اوسه ورته د آسیه بي بي په تړاو مالومات نشته چې چیرته ده.
ملوک د هالنډ په هاګ کې رسنیو ته دا خبرې وکړې خو هلته په پاکستان کې د آسیه بي بي پر ضد اوس هم لاریونونه روان دي او د هغه د مرګ ترڅنګ د قاضیانو د وژلو غوښتنه هم کوي.
لاریون کوونکي وايي، حکومت یوازې له یوه ګوند سره تړون کړی او حال دا چې دا د ټول اسلامي امت موضوع ده.
د کراچۍ کې د جماعت اسلامي څانګې مشر حفیظ نعیم الرحمن وویل، ((حکومت په دې تړاو یوازې له یوه ګوند سره تړون کړی چې لاریون یې کړی و. هغوی په دې تړون سره لاریونونه بند کړل خو دا د ټول ملت موضوع ده، دوه سوه لس میلیونه کسان غواړي چې پوه شي چې آسیه چیرته ده او ولې سزا نه ورکول کیږي او اوس د حکومت دریځ څه دی.))
آسیه بي بي په ۲۰۱۰ کال کې محمد ص او اسلامي ارزښتونو ته د سپکاوي په تور زندان ته تللې وه او محکمې ورته د مرګ سزا اورولې وه خو اوس لادرکه ده.
