د ایران دولت تائید کړه، چې د دې هېواد ۶۳کلن ولسمشر ابراهیم رئیسي، د بهرنیو چارو وزیر حسین امیرعبداللهیان او ورسره ځېني نور چارواکي د چورلکې لوېدو په پېښه کې مړه شوي دي.
په دې چورلکه کې د ایران له اتم ولسمشر ابراهیم رئیسي سربېره د بهرنیو چارو وزیر حسین امیرعبداللهیان، د تبریز د جمعې امام ایتالله محمد علي الهاشم، د ولسمشر رئيس د محافظتي ګارد رئيس او د ختیځ اذربایجان والي مالک رحمتي هم سپاره وو او ټول مړه شوي دي.
دا پېښه له اذربايجان سره د ايران په سرحدي سيمه کې د قزقلعه بند د پرانېستې له مراسمو وروسته، چې د اذربایجان ولسمشر الهام علییف هم په کې ګډون کړی و، رامنځته شوې ده.
د پېښې په قربانيانو کې د ولسمشر محافظتي رئيس تورن جنرال سید مهدي موسوي، د چورلکې پیلوټ، همکار پیلوټ او یو تخنیکرهم شامل دي.
په داسې حال کې چې د ولسمشر رئيسي د چورلکې پرېوتو اصلي لامل نه دی په ډاګه شوی؛ خو د ايران د حکومت ویاند وايي، د چارو د عادي پرمخ وړلو لپاره د امنيت شورا او کابينې بېړنۍ غونډې ترسره شوې.
د ایران حکومت ویاند بهادر جرمي وايي: « ویلی شم د وزیرانو په کچه نن سهار اووه نیمې بجې یوه بېړنۍ ناسته ترسره شوه او شپږ کمېټې وټاکل شوې څو د هېواد روانې چارې په سم ډول سره مخته یوړل شي او دغه راز په یاده ناسته کې پر دې پرېکړه وشوه، چې د حکومتولۍ په چارو کې باید هېڅ ډول سره ځنډ او خنډ رامنځته نشي او د ابراهیم رئیسي په څېر خلک باید خلکو ته خدمت وکړو.»
د ولسمشر رئيسي د سوارلۍ چورلکه تبرېز ته د ستنېدو په حال کې وه، چې ظاهراً د جلفا په نوم له یوې غرنۍ او ځنګلي سیمې د تېرېدو په حال کې لوېدلې.
رئیسي لومړنۍ زدهکړې په مشهد کې پيل کړې او په پنځلس کلنۍ کې د لوړو زده کړو لپاره قُم ته ولاړ. هغه په فقه او ځانګړو حقوقو څانګې کې تر دکتورا زده کړې د مطهري په پوهنتون کې وکړې او په تهران او قُم ښارونو په مختلفو تعليمي او تحصيلي مرکزونو کې یې د فقې تدريس کړی.
هغه ۲۳ کلن و، چې د آیت الله سید احمد عمل الهدای د لور جمیله سادات علم الهدی سره یې واده وکړاو دوې لوڼې ترې لري. نوموړي د فقې په برخې کې څو کتابونه هم لیکلي.
ایراني رسنیو راپور ورکړی چې د ایران ولسمشر ابراهیم رئیسي له مړینې وروسته به لومړی مرستیال محمد مخبر د ايران اساسي قانونو پر بنسټ، د رئیسي پر ځای سرپرست وي.
د ایران ازاد خبریال بهنام یزداني وايي: « له څو ساعتونو پلټنې وروسته د ایران د ولسمشر چورلکه چې تېره ورځ له پېښې سره مخ شوې وه، نن پیدا شوه، چې په یوه ځنګله کې نسکوره شوې او په بشپړه توګه سوځېدلې ده او اته کسان سپاره په کې ټول شهیدان شوې دي، چې ولسمشر رئیسي، د بهرنیو چارو وزیر حسین امیرعبداللهیان، د تبریز د جمعې امام ایتالله محمد علي الهاشم، د ولسمشر رئيس د محافظتي ګارد رئيس او د ختیځ اذربایجان والي مالک رحمتي، پیلوټان او تخنیکي همکاران یې په کې شامل دي.»
ابراهیم رئیسي چې د ۱۹۶۰ کال د ډسمبر پر ۱۴مه زېږېدلی، د ایران اتم ولسمشر و. هغه د ۲۰۲۱ کال ولسمشریزو ټاکنو کې له بریا وروسته د همدغه کال د اګست پر ۲۱مه د ولسمشر په توګه لوړه وکړه.
ابراهیم رئیسي له دې مخکې د نورو مهمو دندو ترڅنګ د ایران د لوی څارنوال او عدلیې وزیر په توګه هم دنده ترسره کړې ده، رئیسي په ۲۰۱۷ کال کې هم د ایران ولسمشریزو ټاکنو ته نوماند و خو هغه مهال د حسن روحاني لخوا له ماتې سره مخ شو.
