د بريټانيا حکومت پاکستان د هغو هېوادونو په نوملړ کې شامل کړی، چې په نړۍ کې د ناامنۍ له کبله ډېر خطرناک هېوادونه دي.
د بریټانيا عامې روغتيا او پاملرنې دفتر په خپاره کړي راپور کې ويلي، په دغه نوملړ کې اته هېوادونه ور زيات شوي چې يو يې هم پاکستان دی .
په راپور کې راغلي، په ټوله نړۍ کې ۲۴ هېوادونه تر نورو زيات ناامنه دي او د بريټانيا وګړي نه شي کولی دغو هېوادونو ته وروسته له دې سفر وکړي.
راپور کاږي، په پاکستان کې امنيتي او طبيعي پېښې، ککړه هوا، ناروغي او ځېنې نور لاملونه د دې سبب شوي چې بريټانيا دغه هېواد ته د خپلو اتباعو ورتګ منع کړی .
د بريتټانيا عمومي شتمنۍ او پرمختګ دفتر وايي: « که چېرې په پلان کې لرئ، چې سفر وکړئ نو هغو هېوادونو ته نشئ تللی چې د ناامنه هېوادونو په نوملړ کې شامل دي.»
بل خوا د سیاسي چارو شنونکي بیا وايي، د بريټانيا له لوري د ناامنه هېوادونو په نوملړ کې د پاکستان شاملېدل به دغه هېواد نړیوال منزويتوب ته ور نږدې کړي.
د سیاسي چارو کارپوه عزیز معارج زیاتوي: « پاکستان په تور لېست کې داخلېږي، یعنې دلته پاکستان له نړیوالې انزوا سره هم مخ کېږي، ځکه وروسته له انګلستانه کېدای شي نور هېوادونه هم ورته عمل وکړي، دلته که سیاسیون هر څه وښيي خو موږ ګورو چې امنیت په پاکستان کې له ډېر پخوا راهیسې خراب دی، تمامه ورځ هلته وژنې دي، ویشتل دي او ځېني ترهګرې ډلې هلته پټنځایونه او روزنځایونه لري او د نړۍ ترهګرې ډلې په پاکستان کې دي؛ مخکې غربي نړۍ غږ نه کاوه، دا اوس ډېره ښه شوه چې دا غږ یې پورته کړو او پاکستان باید مخکې له مخکې دې ته تدابیر درلودی که نه د پاکستان، سیاسي، اقتصادي او امنیتي اړخ تر دې هم بدترېږي او د انزوا حالت ته ځي.»
د سیاسي چارو شنونکی محمد زلمی افغانيار وايي: « له استخباراتي اړخه تر اوسه د پاکستان حکومت او استخباراتي شبکه یې د انګلستان مستعمره ده، دغه پیغامونه د سیاسي موخو او د پاکستان له حاکمانو د ملاتړ لپاره د بريټانیا له لوري دغه موضوع د بحث وړ ګرځېدلې. هیله من یو چې د پاکستان کورنۍ ستونزې د دې لامل نه شي چې افغانستان هم اغېزمن کړي، ځکه چې د افغانستان سوکالي د سیمې او له سیمې د بهرو هېوادونو په ګټه دی.»
په ياد نوملړ کې د پاکستان په شمول، روسيه، اسرائیل، اوکرایين، ايران، فلسطين او افغانستان هم شامل دي چې بریټانوي اتباع يې له ورتګه منع شوي دي.
د تحریک طالبان پاکستان سربېره، داعش خراسان ډله، جیش محمد، لشکر طیبه او بلوڅ آزادي غوښتونکو په شمول لسګونه لویې او وړې وسله والې ډلې شته چې تېر یوه کال کې یې پاکستان کې شاوخوا ۸۰۰ وسله وال بریدونه ترسره کړي.
د راپورنو له مخې، په پاکستان کې يوازې په تېر کال کې له ۸۰۰ زياتې امنيتي پيښې رامنځته شوي چې د سږ کال په تېرو درېيو مياشتو کې دغه کچه نوره هم لوړه شوې ده.
