لسګونو زرو پښتنو د خیبر پښتونخوا په بنو جلسه کې له پاکستانه وغوښتل چې د پښتنو خلاف ظلمونه پای ته ورسوي.
د پښتون ژغورنې غورځنګ مشر منظور پښتون د پاکستان ریاست ته خبرداری ورکړ، که پر پښتنو ظلمونه پای ته ونه رسوي، نو اړ به شي چې وسله پورته کړي.
منظور پښتون خپلې غوښتنې یو ځل بیا تکرار کړي او له پاکستانه یې وغوښتل چې بې ګناه پښتانه خوشې کړي، راو انور محاکمه کړي او له پښتنو سیمو دې ماینونه پاک شي.
خو د میندو او وړو ماشومانو په ګډون لسګونو زرو پښتنو د پاکستان د ریاست جبر ته سر ټیټ نه کړ او په مېړانه د خپلو حقونو غوښتلو لپاره غونډې ته ورغلل.
غونډې ته د بنو ښار له اوسېدونکو سربېره له قبایلي سیمو او بلوچستان هم ګڼ خلک ورغلي وو چې د ډېر شمېر کورنیو غړو په کې د خپلو ورکو شویو خپلوانو عکسونه هم لرل.
پښتون ژغورنې غورځنګ وایي، د پنجاب حکومت که له یو لوري ماشومان د پلرونو، ترونو او ورونو له نعمت او مینې محروم کړي، بل لور ته یې اته اتیا کلن سپین ږیری هم پر زړه کړولی دی.
فیض محمد کاکا په محکومه پښتونخوا کې د پاکستان تر حاکمیت او ریاست لاندې د ماشومتوب او ځوانۍ پسرلي تېر کړي، وايي چې پاکستان د پښتنو دوست نه دی پاتې شوی.
فیض محمد کاکا موده وړاندې د پاکستان پوځ زنداني کړی هم و.
منظور پښتون خپل فعالیت د محسودو د حق غوښتنې لپاره پیل کړ، خو کرار کرار یې پښتنو ملاتړ وکړ چې نن د پښتون ژغورنې په نوم د ځورېدلي خو ننګیالي پښتون قام غږ دی.
میاشتې وشوې چې د پاکستان حکومت د منظور پښتنو غوښتنې و نه منلې، دا ځل پښتون خبرداری ورکړی چې نور مجبور دی د پښتنو د حق غوښتلو لپاره وسله پورته کړي.
د پاکستان حکومت ویلي چې د پښتون ژغورنې غورځنګ له لوري ټولې مطرح شوې غوښتنې یې منلي، خو د پښتون ژغورنې غورځنګ حکومت په دروغو تورنوي او وايي چې لا هم بې شمېره بې ګناه پښتانه د پاکستان په زندانونو کې دي او نور پښتانه هم نیول کېږي.
