د اکتوبر له اوومې راهيسې چې په غزې کې پر حماس د اسرائیلی ځواکونو هوايي او ځمکني بریدونه دوام لري، د ماشومانو او ښځو په ګډون څه باندې ۱۴زره فلسطیني وګړي په کې وژل شوي او زرګونه نور ټپيان دي.
تازه قطر اعلان کړی، چې د بشري ناورین مخنیوي لپاره يې د اسرائيلو او حماس ترمنځ د څلور ورځني اوربند هوکړه شوې.
د قطر بهرنيو چارو وزارت له لوري خپره شوې خبرپاڼه کې ويل شوي، د ياد اوربند په لړ کې به دواړه لوري برمته کړي کسان سره تبادله کوي.
د قطر لومړی وزیر محمد ابن عبدالرحمن آل ثاني ویلي:« موږ له خپلو همکارانو مننه کوو، چې په غزه کې یې د بشري ناورین مخنیوي لپاره مرسته کړې او په ځانګړې توګه امریکا او مصر. موږ هېله من یو چې دا به یو هر اړخیز او دوامداره تړون رامینځته کړي، څو خونړي بریدونه په کې ودرېږي.»
د دې لنډمهاله اوربند په تړاو حماس ډلې ویلي، ۱۵۰فلسطیني ښځې او ماشومان به د اسرائیلو له بنده ازاد شي، خو د يادې ډلې په خبره پر دې برسیره به له اسرائیلي ځواکونو سره جګړه دوام ولري.
حماس ډلې مشر اسماعیل هنیه وايي:« په دې لنډ مهاله اوربند کې به ۱۵۰ فلسطیني وګړي د اسرائیلو له لاسونو ازاد شي، خو د دې ترڅنګ به پر غزې د اسرائیلي ځواکونو یرغل ورته د منلو نه دی او د غزې تر ازادېدو پورې به جګړې ته دوام ورکوي.»
د اوربند له هوکړې وروسته اسرائیلو لومړي وزیر بینیامین نتنیاهو ویلي، دا څلور ورځنی اوربند یې له حماس ډلې سره د جګړې د درېدو په مانا نه دی او خپلو موخو ته تر رسېدو پورې به بریدونو ته دوام ورکړي.
نتنیاهو زیاته کړې:« د هر یرغمل شوي په ازادېدو سره به اوربند ورسره غځوي، خو پر دې برسېره به په سیمه کې تر هغې پاتې شي، څو د اسرائیلو پر وړاندې ګواښ نه وي ختم شوی.»
د راپورونو له مخې، په غزې کې د روانې خونړۍ جګړې له امله د ښځو او ماشومانو په ګډون له اتو زرو زیات د غزې اوسېدونکي د اسرائیلو په زندانونو کې دي او څه کم ۲۰۰ اسرائیلي وګړي بيا د حماس ډلې لخوا د اکتوبر پر شپږمه نیول شوي.
