د اسرائیلو ځواکونو غزه کې د جبالیه پنډغالي او تلالزتار ته څېرمه پر دوو ښوونځيو هوايي برېدونه کړي چې له امله یې د ښځو او ماشومانو په ګډون له۸۰ زیات کسان وژل شوي او لسګونه نور ټپیان دي.
ملګرو ملتونو سازمان ویلي، غزې ته د دې سازمان استول شوي پلاوي څېړنې ښيي، چې د اسرائیلي ځواکونو بریدونو بې مخینې وحشت رامنځته کړی او پایله کې يې روغتونونه او ښوونځي پر هدیرو بدل شوي دي.
یاد سازمان زیاته کړې:« د ماشومانو په ګډون لسګونه کسانو ته په الفخوره ښوونځي کې مرګ ژوبله اوښتې. په غزې کې هېڅ ځای خوندي نه دی. دا وحشت نور باید پای ته ورسېږي.»
د دې ترڅنګ د فلسطین ولسمشر محمود عباس پر غزې د اسرائیلي ځواکونو د بریدونو د درېدا لپاره د امریکا له ولسمشر جوبایډن څخه پر اسرائیلو د فشار راوړلو غوښتنه کړې.
عباس زیاته کړې:« د امریکا په منځګړیتوب له دې هېواد غواړو، چې د اسرائیلو د خونړیو بریدونو وحشت پای ته ورسوي او پر اسرائیلو فشار راوړي، چې پر غزې روان خونړي بریدونه ودروي.»
بل خوا د اسرائیلو لومړی وزیر بینیامین نتنیاهو وايي، جګړه به د یرغمل شویو اسرائیلي وګړو تر ازادېدو پورې روانه ساتي او هغه ګواښونه به له منځه وړي، چې اسرائیل يې په اړه اندېښنه لري.
هغه زیاتوي:« د حماس ډلې پر وړاندې بریدونه به تر هغې دوام وکړي، چې د حماس ډلې لخوا یرغمل شوي اسرائیلیان خپلو کورونو ته نه وي راستانه شوي او د سیمې ثبات نه وي ډاډمن شوی.»
د اکتوبر له اوومې راپدېخوا چې اسرائیلي ځواکونو پرغزې هوايي او ځمکني بریدونه پیل کړي، د لسګونه خبريالانو او د ملګرو ملتونو د کارکوونکو په ګډون څه باندې ۱۲۰۰۰ فلسطينيان وژل شوي او له ۳۱زره زیات ټپیان شوي دي، چې له نیمايي زیات یې ښځې او ماشومان دي.
