د اکتوبر له اوومې کله اسرائیلو په غزې هوايي بریدونه پیل کړل په ډېرو اسلامي هېوادونو کې د اسرائیلو پر ضد لاریونونه وشول او د دا یې د غزې پر خلکو ښکاره تېری وباله.
ملګري ملتونه وايي، په غزه کې د اسرائيلي ځواکونو د بريدونو د دوام له امله بشري ناورین رامنځته شوی او په خبره يې په ورځنۍ توګه سلګونه فلسطيانو ته په يادو بريدونو کې مرګ ژوبله اوړي.
د ملګرو ملتونو شمېرې ښيي، چې د اسرائيلي ځواکونو د بريدونو په ترڅ کې ۴۲۰ ماشومانو ته مرګ ژوبله اوښتې او په خبره یې دا شمېر د تېرو ۴ کلونو د جګړې پرتله خورا لوړ شمېر دی.
بل خوا د اسرائيلو لومړي وزير بینیامین نتنیاهو د نړيوالو هغه وړانديز رد کړی، چې په غزې کې د اوربند په اړه شوی وه.
نتنیاهو زیاته کړې:« دا به حماس ته د تسلمېدو په مانا وي. اوس د یاغیانو پر وړاندې د جګړې وخت دی. که هغوی بریالي شي، نو ټوله نړۍ به وګواښي.»
خو يو شمېر هغو هېوادونو چې په دې جګړې د اسراتئيلو ترڅنګ ولاړ دي هم له دې هېواد په غزې کې د بېړني اوربند غوښتنه کړې.
د يادو غوښتنو پر دوام د امريکا ولسمشر جو بایډڼ ويلي، له اسرائيلو سره يې په غزې کې د وروستيو پرمختګونو او بشري وضعيت په اړه خبرې کړي.
بایډن زیاته کړې:« ما د اسرائیلو له لومړي وزیر بینیامین نتنیاهو سره په غزې کې د اسرائیلو د وروستیو پرمختګونو اړوند خبرې وکړې او ټینګار مې پرې وکړ، چې غزې ته بېړنۍ بشردوستانه مرستې باید زیاتې شي.»
د فلسطین روغتیا وزارت وايي، د اکټوبر له ۷ چې کله د اسرائیلو پوځ پر غزې هوايي او ځمکني بریدونه پیل کړل، څه باندې ۸ زره فلسطینیان وژل شوي او شاوخوا ۱۷ زره نور ټپیان دي، چې یوازې تېره شپه ۲۰ فلسطینان ووژل شول.
