د دوو اوونیو په تېریدو لا هم پر غزې تړانګه د اسرائیلو هوايي بریدونه دوام لري، چې تېره شپه یې تر ټولو خونړۍ هغه وه.
د فلسطین روغتیا وزارت ویلي، په تېرو ۲۴ ساعتونو کې ۷۰۰ فلسطینیان د اسرائيلي ځواکونو په بريدونو کې وژل شوي.
د رسنيو د راپورو له مخې، د غزې اوسېدونکي د دې ښار له وېجاړو شویو ځايونو د وژل شویو کسانو د را اېستلو په هڅه کې دي.
د ملګرو ملتونو سرمنشي انټونیو ګوتېریش په غزې کې وضعيت ته په کتو د اسرائیلو وروستیو هوایي بریدونو ته په اشارې سره ويلي، هغه څه چې په غزې کې روان دي، د اسرائيلو له لوري د بشري قوانينو نقض دی.
هغه زیاته کړې:« پر دې باید وپوهیږو، چې د حماس برید د غزې پر تړانګه یوه ناڅاپي تشه نشو حسابولی او هغه څه چې اوس په غزه کې د اسرائیلو له خوا ترسره کېږی، له بشري دوستانه قوانینو ښکاره سرغړونه ده.»
له دې سره چین، روسیې او ایران پر غزې د اسرائیلي ځواکونو هوايي بریدونه غندلي.
د چین بهرنیو چارو وزیر وانګ يي د فلسطین له بهرنیو چارو وزیر سره په ټیلفوني خبرو کې، د بشردوستانه مرستو د رسولو پر لارو چارو غږېدلی.
وانګ یي زیاته کړې:« موږ د فلسطین او په ځانګړي ډول د غزې اوسېدونکو په اړه اندېښنه لرو. هڅه به وکړو چې خپلې بشري مرستې د غزې اوسېدونکو ته ورسوو.»
سعودي عربستان، مصر، قطر او کوېټ هم پر غزې د اسرائیلو هوايي بریدونو دوام په کلکه غندلی او هلته يې د يوه بېړني اوربند د نافذېدو غوښتنه کړې.
د فلسطین روغتیا وزارت د مالوماتو له مخې، د اکټوبر له ۷مې راهيسې چې اسرائیلو پر غزې تړانګه هوايي بریدونه پیل کړي، ۵۷۹۱ فلسطینان وژل شوي او څه باندې ۱۶۰۰۰ نور ټپیان شوي دي.
