په خوست کې ولایت کې په لومړي ځل د صابون جوړولو یوې کارخونې په فعالیت پيل وکړ.
د کارخونې مسوول عبدالله وايي، د خپل کاروبار ترڅنګ به د صابون توليد په برخه کې هم پر ځان بسيا کېدو ته هڅې وکړي.
عبدالله وايي، اوسنی کاروبار يې له درې ميليونه افغانيو پيل کړی او ۲۰ کسانو ته کاري فرصتونو په برابرولو سره بېلابېل ډول صابون توليدوي.
هغه زیاتوي:« موږ تر دې مهاله پنځه ډوله د ځان وېنځلو صابون وړاندې کړی دی. هڅه مو دا ده، چې بازار ته یې هم وړاندې کړو. موږ په دې کارخونه کې شااوخوا ۲۹۰ کسانو ته د کار زمېنه برابره کړې.»
په ورته مهال په یاده کارخونه کې پر کار بوخت کسان خوښ دي چې په خپل وطن کې ورته د کار زمینه برابره شوې ده.
دوی پر دې سربېره له پانګه والو او حکومت غوښتنه کوي، چې په کورد ننه د پانګونې زمینه برابره کړي تر څو لا ډېرو خلکو ته کاري زمینې برابرې شي.
د کارخونې یو تن کاریګر حمیدالله وايي:« ډېر خوښ یم، چې دلته پر کار مصروف یم. په دې خوشاله چې په کوردننه راته د کار زمېنه برابره شوه. نن سبا په هېواد کې بې کاري ډېره زیاته ده. تجاران باید په خپل هېواد کې پانګونه وکړي.»
د یادونې وړ ده چې په خوست کې دا مهال شاواخوا دوه سوه بېلابېلې صنعتي کارخونې فعالې دي، چې په کې زرګونه خلکو ته د کار زمینه برابره شوې خو مسوولین یې تل د یوه صنعتي پارک او منظمې برېښنا نشتون د کارونو پر وړاندې لوی خنډونه ګڼي.
