امریکايي پادري سپینه ماڼۍ کې له ټرمپ سره وکتل.
دغه امریکايي پادري اندریو برېنسن په څلور ویشت ساعتونو کې د ترکیې له زندان څخه سپینې ماڼۍ ته ورسید.
هغه د امریکا له ولسمشر ډونالډ ټرمپ سره د لیدنې پر مهال د بهرنیو چارو وزیر مایک پمپیو څخه مننه وکړه چې په ازادیدو کې یې ډیره مرسته کړې.
امریکايي پادري چې په ترکیه کې یوه نیمه میاشت بندي و په ۲۴ ساعتونو کې سپینې ماڼۍ ته ورسید.
د امریکا ولسمشر ډونالډ ټرمپ وايي دا ډیره جالبه ده چې یو کس دې د ترکیې له زندان څخه سپینې ماڼۍ ته په ۲۴ ساعتونو کې ورسیږي.
د امریکا ولسمشر ډونالډ ټرمپ وویل، ((دا ډیره جالبه ورځ ده، ځکه لکه څنګه چې تاسې واورېدل، ما وړاندې هم وویل، یو کس د ترکیې له زندان څخه سپینې ماڼۍ ته په ۲۴ ساعتونو کې رسیږي، دا ګوره ډیره بده نه ده.))
ډونالډ ټرمپ په دغه ناسته کې د ترکیې له ولسمشر رجب طیب اردوغان څخه هم مننه وکړه او دا کار یې له ترکیې سره د تازه اړیکو لپاره نوی پېل وباله. امریکايي پادري اندریو برېنسن او ډونالډ ټرمپ په اوول دفتر کې دغه ناسته وکړه.
برېنسن وویل چې د امریکا د بهرنیو چارو وزیر مایک پمپیو د هغه په را خوشې کیدو کې ډیره مبارزه وکړه.
امریکايي پادري اندریو برېنسن وویل، ((موږ باید په ځانګړې توګه لومړی د ټرمپ له ادارې مننه وکړو، له هغې ورځې چې تاسې دفتر ته راغلي یاست، تاسې زموږ لپاره ډیره مبارزه کړې ده. زه پوهیږم چې بهرنیو چارو وزیر مایک پمپیو هم زموږ لپاره ډیره مبارزه کړې چې مننه ترې کوو.))
اندریو برېنسن وايي، ترکیه یې کور دی او شاوخوا ۲۵ کلونه هلته اوسېدلی دی.
پر برېنسن تیره میاشت له ترهګرو سره د اړیکو تور پورې شو چې له امله یې په درې کلن بند محکوم شو.
واشنګټن د دغه پادري د بندي کیدو له امله پر ترکیې بندیزونه هم ولګول او له هغوی یې وغوښتل چې ژر باید برېنسن خوشې کړي.
